തൃശൂര്: രാജ്യസഭാംഗം സി. സദാനന്ദന് മാസ്റ്ററുടെയും ടി. വനിതാറാണി ടീച്ചറുടേയും മകള് യമുനാഭാരതി വിവാഹിതയായി. പ്രധാനമന്ത്രി നരേന്ദ്രമോദിയുടെ ആഹ്വാനം കണക്കിലെടുത്ത് സ്വര്ണാഭരണങ്ങള് ഒഴിവാക്കിയായിരുന്നു വിവാഹം. ഗുരുവായൂര് ക്ഷേത്രത്തിലാണ് വ്യാഴാഴ്ച വിവാഹം നടന്നത്. ജനം ടിവി ദല്ഹി ബ്യൂറോ ചീഫും കൊല്ലം കരുകോണ് പരേതനായ സുരേന്ദ്രന് പിള്ളയുടെയും രമാദേവിയുടേയും മകന് ശ്രീകാന്താണ് വരന്.
രാജ്യം നേരിടുന്ന സാമ്പത്തിക പ്രതിസന്ധി മറികടക്കാന് സ്വര്ണം വാങ്ങുന്നത് കുറയ്ക്കണമെന്ന പ്രധാനമന്ത്രിയുടെ നിര്ദ്ദേശം വധൂവരന്മാര് ഏറ്റെടുക്കുകയായിരുന്നുവെന്ന് സദാനന്ദന് മാസ്റ്റര് പറഞ്ഞു. ഫാന്സി ആഭരണങ്ങള് മാത്രമാണ് വധു അണിഞ്ഞത്. വിവാഹത്തില് മുതിര്ന്ന ആര്എസ്എസ് പ്രചാരകന് എസ്. സേതുമാധവന്, പ്രജ്ഞാപ്രവാഹ് ദേശീയ സംയോജക് ജെ. നന്ദകുമാര്, ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖര് എംഎല്എ, മുന് പ്രസിഡന്റ് കെ. സുരേന്ദ്രന് മറ്റ് സംസ്ഥാന നേതാക്കള് തുടങ്ങിയവര് പങ്കെടുത്തു.
