പുതുച്ചേരി: ആവേശം അവസാന നിമിഷം വരെ നീണ്ടുനിന്ന ജൂനിയര് ബാസ്കറ്റ്ബോള് വനിതാ വിഭാഗം ഫൈനല് പോരാട്ടത്തില് കേരളത്തെ 55-51 ന് കീഴടക്കി ഛത്തീസ്ഗഡ് ജൂനിയര് നാഷണല് ബാസ്കറ്റ്ബോള് ചാമ്പ്യന്ഷിപ്പ് കിരീടം ചൂടി.
മത്സരത്തിന്റെ തുടക്കം മുതല് കടുത്ത ആക്രമണം അഴിച്ചുവിട്ട ഛത്തീസ്ഗഡ് ആദ്യ ക്വാര്ട്ടറില് 19-11 ന്റെ ശക്തമായ ലീഡ് നേടി കേരളത്തെ പ്രതിരോധത്തിലാക്കി. എന്നാല് രണ്ടാം ക്വാര്ട്ടറില് തകര്പ്പന് തിരിച്ചുവരവ് നടത്തിയ കേരളം എതിരാളികളുടെ പ്രതിരോധപ്പിഴവുകള് മുതലെടുത്ത് 17-10 ന് മുന്നിലെത്തി. ഇതോടെ ഹാഫ് ടൈം വിസിലടിക്കുമ്പോള് ഛത്തീസ്ഗഡിന്റെ ലീഡ് വെറും ഒരു പോയിന്റായി (2928) ചുരുങ്ങി. തന്ത്രപരമായ നീക്കങ്ങള് കണ്ട മൂന്നാം ക്വാര്ട്ടറിലും കേരളം കടുത്ത സമ്മര്ദ്ദം ചെലുത്തി 11-10 ന് നേരിയ ലീഡ് നിലനിര്ത്തി. എന്നാല് മത്സരത്തിന്റെ നിര്ണായകമായ അവസാന ക്വാര്ട്ടറില് ചാമ്പ്യന്മാരുടെ പരിചയസമ്പത്തുമായി തിരിച്ചുവന്ന ഛത്തീസ്ഗഡ് ശക്തമായ പ്രതിരോധവും വേഗതയേറിയ കൗണ്ടര് അറ്റാക്കുകളും പുറത്തെടുത്തു. അവസാന ക്വാര്ട്ടര് 16-12 ന് സ്വന്തമാക്കിയ അവര് കേരളത്തിന്റെ കിരീടമോഹങ്ങള് തകര്ത്തു. ഛത്തീസ്ഗഡിനായി 22 പോയിന്റുകള് നേടിയ ദിവ്യ രംഗാരിയാണ് ടോപ്പ് സ്കോറര്. ക്യാപ്റ്റന് അഞ്ജലി കൊഡാപെ 14 പോയിന്റുകള് നേടി ടീമിനെ നയിച്ചു. കേരളത്തിനായി ലിയ മരിയ, സുഭദ്ര ജയകുമാര് എന്നിവര് 12 പോയിന്റുകള് വീതവും വൈഗ ടി. 11 പോയിന്റും നേടി മികച്ച പോരാട്ടം കാഴ്ചവച്ചു.
