എഐയിലേക്ക് ശ്രദ്ധതിരിച്ച വിപ്രോയ്‌ക്ക് മുന്നേറ്റം, വിപ്രോയെ സഹായിക്കുന്നത് എജന്‍റിക് എഐ കമ്പനി

മുംബൈ:: ഐടി സേവന കമ്പനി വിപ്രോ നിര്‍മിതബുദ്ധി വ്യാപകമായി ഉപയോഗിച്ചു കമ്പനിയുടെ പ്രവര്‍ത്തനത്തില്‍ വലിയ മാറ്റത്തിന് ഒരുങ്ങുന്നു. അസിം പ്രേംജിയുടെ മകന്‍ റിഷാദ് പ്രേംജിയാണ് ഈ ചുവടുമാറ്റത്തിന് ചുക്കാന്‍ പിടിക്കുന്നത്. സര്‍വീസ് നൗവുമായി കമ്പനി വിശാലസഖ്യം പ്രഖ്യാപിച്ചു. ഏജന്‍റിക് എഐ എന്ന കമ്പനിയുടെ സേവനമാണ് വിപ്രോ ഉപയോഗിക്കുന്നത്.ഇതോടെ വിപ്രോ ഓഹരിവില കുതിയ്‌ക്കുകയാണ്. വിപ്രോ എഡിആര്‍ പത്തു ദിവസം കൊണ്ട് 31 ശതമാനം കുതിച്ചു. ഇന്നലെ മാത്രം 18.5 ശതമാനം കയറി.

വിപ്രോയുടെ എഐ സ്യൂട്ട് ആയ വിപ്രോ ഇന്റലിജന്‍സിനെ സര്‍വീസ് നൗവിന്റെ എഐ പ്ലാറ്റ്‌ഫോമുമായി സംയോജിപ്പിക്കുന്നത് വലിയ മുന്നേറ്റത്തിന് വഴിയൊരുക്കും. ഇതുവഴി മാനുഷിക ഇടപെടല്‍ തീര്‍ത്തും ഇല്ലാതെ കമ്പനിയുടെ ജോലികളുടെ ഏകോപനവും പ്രവര്‍ത്തനവും നടക്കും.

കമ്പനി ബിസിനസില്‍ മുന്നേറുന്നതോടെ കമ്പനിയുടെ ഓഹരി തിരിച്ചു വാങ്ങാനും വിപ്രോ ഒരുങ്ങുന്നു. ജൂണ്‍ അഞ്ച് ആണ് ഓഹരികള്‍ തിരിച്ചുവാങ്ങാനുള്ള റെക്കോര്‍ഡ് തീയതിയായി പ്രഖ്യാപിച്ചിരിക്കുന്തന്. 15,000 കോടി രൂപയാണു തിരിച്ചു വാങ്ങലിനു മാറ്റിവച്ചിട്ടുള്ളത്. 5.72 ശതമാനം ഓഹരി (60 കോടി എണ്ണം) തിരിച്ചു വാങ്ങും. 250 രൂപയ്‌ക്കാണു തിരിച്ചു വാങ്ങല്‍. കഴിഞ്ഞ ദിവസം 201.70 രൂപയിലാണ് ഓഹരി ക്ലോസ് ചെയ്തത്.