കൊച്ചി: മുനമ്പത്തെ വഞ്ചനയ്‌ക്കെതിരെ വി.ഡി. സതീശന്‍ സര്‍ക്കാരിന്റെ പത്താം ദിനത്തില്‍ മുനമ്പം നിവാസികള്‍ പന്തംകൊളുത്തി പ്രകടനം നടത്തി. വഖഫ് ഭീകരതയ്‌ക്കെതിരെ പോരാട്ടം നടക്കുമ്പോള്‍ സമരപ്പന്തലിലെത്തിയ വി.ഡി. സതീശന്‍ അധികാരത്തിലെത്തിയാല്‍ പത്ത് മിനിറ്റുകൊണ്ട് പ്രശ്‌നം പരിഹരിക്കുമെന്നാണ് പ്രഖ്യാപിച്ചിരുന്നത്. എന്നാല്‍ അധികാരത്തിലെത്തിയപ്പോള്‍ മുനമ്പം ജനതയെ യുഡിഎഫ് സര്‍ക്കാര്‍ വഞ്ചിക്കുകയായിരുന്നു. ഇതില്‍ പ്രതിഷേധിച്ചാണ് മുനമ്പം ജനത ഇന്നലെ പന്തം കൊളുത്തി പ്രകടനം നടത്തിയത്.
മുനമ്പം പുലിമുട്ട് പരിസരത്ത് നിന്ന് ആരംഭിച്ച പന്തംകൊളുത്തി പ്രകടനം വേളാങ്കണ്ണിമാത പള്ളിക്ക് സമീപമുള്ള സമരപ്പന്തലില്‍ സമാപിച്ചു. വി.ഡി. സതീശന്റെ കോലം സമരക്കാര്‍ കത്തിച്ചു. ഫിലിപ്പ് ജോസഫ്, റോയ് കുരിശിങ്കല്‍, പി.കെ. വേലായുധന്‍, ഇ.എസ്. പുരുഷോത്തമന്‍ എന്നിവര്‍ നേതൃത്വം നല്‍കി.
