കൊല്‍ക്കത്ത: കഴിഞ്ഞ ഡിസംബറില്‍ കൊല്‍ക്കത്ത നഗരത്തില്‍ ലോക ഫുട്‌ബോളിലെ സൂപ്പര്‍ താരം ലയണല്‍ മെസിയുടെ വരവിനിടെ സ്ഥാപിച്ച സുവര്‍ണ നിറത്തിലുള്ള പ്രതിമ നീക്കിയേക്കും. കാറ്റിലും മറ്റും ആടിയുലയുന്നതായി ശ്രദ്ധയില്‍ പെട്ടതോടെയാണ് പ്രതിമയുടെ സുരക്ഷ കണക്കിലെടുത്ത് നീക്കം ചെയ്യാനൊരുങ്ങുന്നത്.
ആടി ഉലയുന്നത് ശ്രദ്ധയില്‍ പെട്ടതോടെ നാല് വശത്തേക്കും കയറിട്ടു കെട്ടി നിര്‍ത്തിയിരിക്കുകയാണ്. നഗര മദ്ധ്യത്തില്‍ തിരക്കേറിയ റോഡായതിനാല്‍ ഈ നിലയില്‍ അധികം മുന്നോട്ട് കൊണ്ടുപോകാനാകില്ല. അതിനാലാണ് ഇവിടെ നിന്നും മാറ്റുന്നതെന്ന് അധികൃതര്‍ വ്യക്തമാക്കി.
കഴിഞ്ഞ ഡിസംബറിലാണ് മെസി ഭാരതത്തിലെ നാല് നഗരങ്ങളിലായി പര്യടനം നടത്തിയത്. ആദ്യം വന്നിറങ്ങിയ കൊല്‍ക്കത്ത നഗരത്തിന്റെ കിഴക്ക് ഭാഗത്താണ് 70 അടിയോളം ഉയരമുള്ള പ്രതിമ സ്ഥാപിച്ചത്. പ്രതിമ മറ്റൊരിടത്ത് സ്ഥാപിക്കുമോയെന്ന കാര്യം പിന്നീടേ പറയാന്‍ പറ്റൂവെന്ന് പ്രദേശം ഇരിക്കുന്ന ഭാഗത്തെ എംഎല്‍എ ആയ ശരദ്വത്ത് മുഖര്‍ജ പറഞ്ഞു.
