കൊച്ചി : മുഖ്യമന്ത്രി വി ഡി സതീശന് അദ്ദേഹത്തിന്റെ മണ്ഡലമായ പറവൂരില് നല്കിയ സ്വീകരണ ചടങ്ങില് അതിഥിയായി മലയാളത്തിന്റെ സൂപ്പര്താരം മോഹന്ലാല്.വി ഡി സതീശനില് സത്യസന്ധത, സുതാര്യത എന്നീ ഗുണങ്ങള് പ്രകടമാണെന്ന് താരം പറഞ്ഞു.ഏത് വെല്ലുവിളി നിറഞ്ഞ ഘട്ടത്തിലും അത് നിലനിര്ത്താന് അദ്ദേഹത്തിന് സാധിക്കട്ടെ എന്ന് ആശംസിക്കുന്നുവെന്നും മോഹന്ലാല് പറഞ്ഞു.
അദ്ദേഹത്തില് കേരളം വലിയ പ്രതീക്ഷയര്പ്പിക്കുന്നു. നിരവധി സാധ്യതകള് വി ഡി സതീശന് മുന്നിലുണ്ട്.മോഹന്ലാലിന് പുറമെ ശ്രീകുമാരന് തമ്പി, സലിംകുമാര് തുടങ്ങിയ പ്രമുഖരും ചടങ്ങില് പങ്കെടുത്തു.
ഭൂമിയിലെ മനോഹരമായ സ്ഥലത്തെ ഭാഗ്യവാനായ മുഖ്യമന്ത്രിയാണ് വി ഡി സതീശനെന്ന് തന്റെ പ്രസംഗത്തില് മോഹന്ലാല് സൂചിപ്പിച്ചു.യുവാക്കള്ക്കും കുട്ടികള്ക്കുമിടയില് വര്ധിച്ചുവരുന്ന ലഹരി ഉപയോഗം, വര്ധിച്ചുവരുന്ന റോഡപകടങ്ങള് മുതലായ വിഷയങ്ങള് മുഖ്യമന്ത്രി വേദിയിലിരിക്കെ മോഹന്ലാല് ചൂണ്ടിക്കാട്ടി.കേരളത്തിന്റെ അമൂല്യ സമ്പത്തിനെ വേണ്ടരീതിയില് സര്ക്കാരുകള്ക്ക് വിനിയോഗിക്കാന് കഴിഞ്ഞോ എന്ന് താന് സംശയിക്കാറുണ്ടെന്ന് മോഹന്ലാല് പറഞ്ഞു. നാടിന്റെ കല, സംസ്കാരം, വാണിജ്യം, വിഭവങ്ങള്, കാലാവസ്ഥചരിത്രം, പ്രാദേശിക ഭംഗികള് എന്നിവ ഭരണാധികാരിക്ക് മുന്നില് വെല്ലുവിളിയും സാധ്യതകളും തുറക്കുന്നു.
ഒരാളെ മുഖ്യമന്ത്രിയാക്കാന് നാടൊന്നായി മുറവിളി കൂട്ടിയ അനുഭവം ചരിത്രത്തില് വിരളമാണ്. കേരളത്തിനാകെ ഈ ഒരാളെ വേണമെന്ന് തോന്നാല് കാരണമെന്തെന്ന് താന് ചിന്തിച്ചു.സത്യസന്ധതയും സുതാര്യതയും വി ഡി സതീശന് ഉണ്ടെന്നതാണ് താന് കണ്ടെത്തിയതെന്നും മോഹന്ലാല് പറഞ്ഞു.
അതേസമയം ചടങ്ങില് തന്റെ പ്രസംഗത്തിനിടെ ശ്രീകുമാരന് തമ്പി മുന് മുഖ്യമന്ത്രി പിണറായി വിജയനെതിരെ പരോക്ഷ വിമര്ശനം ഉന്നയിച്ചു. ജനങ്ങളുടെ വോട്ട് വാങ്ങി അധികാരത്തിലെത്തിയാല് രാജാവായി എന്ന് ധരിക്കരുത്. ചിലര് കേരളത്തിലെ രാജാവെന്നും ജനങ്ങള് പ്രജകളെന്നും കരുതിയെന്നും അദ്ദേഹം പറഞ്ഞു.
