ഇരിട്ടി: കൊട്ടിയൂര്‍ വൈശാഖ മഹോത്സവത്തിന് തുടക്കംകുറിച്ചുകൊണ്ട് ഈ മാസം 28 ന് നടക്കുന്ന നെയ്യാട്ടത്തിനായി വ്രതം നോല്‍ക്കുന്ന വിവിധ മഠങ്ങളിലെ ഭക്തസംഘങ്ങള്‍ കലശം കുളിച്ച് മഠങ്ങളില്‍ പ്രവേശിച്ച് കഠിനവ്രതം ആരംഭിച്ചു. കഴിഞ്ഞ പ്രക്കൂഴം നാള്‍തൊട്ടാണ് നെയ്യമൃത് സംഘങ്ങള്‍ വ്രതം ആരംഭിച്ചത്. കലശം കുളിച്ച് മഠങ്ങളില്‍ക്കയറിയതോടെ വരുന്ന ഏഴ് നാളുകള്‍ കഠിനവ്രതമാണ് ഇവിടെ ഇവര്‍ നയിക്കുക.
ഇരിട്ടി മേഖലയില്‍ കീഴൂര്‍ ഇടവയിലെ കീഴൂര്‍, പുന്നാട് കുഴുമ്പില്‍, മുഴക്കുന്നിലെ പാല, വട്ടക്കയം, ചാവശ്ശേരി, തില്ലങ്കേരി, മുരിങ്ങോടി, തിരുവോണപ്പുറം, ആറളം മഠങ്ങളിലെ നെയ്യമൃത് വ്രതക്കാര്‍ ഇന്നലെ രാവിലെ അതാതിടങ്ങളില്‍ നടന്ന ചടങ്ങുകളില്‍ കലശം കുളിച്ചാണ് കഠിനവ്രതം ആരംഭിച്ചത്.
കീഴൂര്‍ മഹാദേവക്ഷേത്രത്തോടനുബന്ധിച്ച കീഴൂര്‍ മഠത്തില്‍ മഠം കാരണവര്‍ പി.ആര്‍. ഉണ്ണികൃഷ്ണന്‍ നമ്പ്യാരുടെ നേതൃത്വത്തില്‍ 15 പേരാണ് വ്രതം നോല്‍ക്കുന്നത്. ഇവിടെ നടന്ന കലശംകുളി ചടങ്ങുകള്‍ക്ക് ക്ഷേത്രം മേല്‍ശാന്തി സുബ്രഹ്മണ്യന്‍ നമ്പൂതിരിപ്പാട് കാര്‍മ്മികത്വം വഹിച്ചു. പുന്നാട് കുഴുമ്പില്‍ മഠത്തില്‍ നിട്ടൂര്‍ ഗോവിന്ദന്‍ നമ്പ്യാരുടെ നേതൃത്വത്തില്‍ 21 വ്രതക്കാരാണ് ഇത്തവണ കലശംകുളിച്ച് മഠത്തില്‍ പ്രവേശിച്ചത്. നമ്പൂതിരിമാരായ നവഹാരന്‍, രാജേഷ് എന്നിവരുടെ നേതൃത്വത്തിലാണ് ചടങ്ങുകള്‍ നടന്നത്.
തില്ലങ്കേരി മഠത്തില്‍ കാരണവര്‍ വിലങ്ങേരി പത്മനാഭന്‍ നമ്പ്യാരുടെ നേതൃത്വത്തില്‍ 64 പേരാണ് ഇക്കുറി നെയ്യമൃത് സംഘത്തില്‍ ഉള്ളത്. ഇവരും കലശം കുളിച്ച് മഠത്തില്‍ പ്രവേശിച്ച് കഠിനവ്രതം ആരംഭിച്ചു. തിരുവോണപ്പുറം മഠത്തില്‍ മുപ്പത് പേരാണ് കലശം കുളിച്ച് മഠത്തില്‍ കയറിയത്.
കൂത്തുപറമ്പ്: കൊട്ടിയൂര്‍വൈശാഖ മഹോത്സവത്തിന്റെ പ്രാരംഭം കുറിക്കുന്ന ചടങ്ങായ നെയ്യാട്ടത്തി ന് നെയ്യുമായി പോകുന്ന നെയ്യമൃത് സംഘം കലശം കുളിച്ച് മഠത്തില്‍ കയറി. ശങ്കരനെല്ലൂര്‍ ചന്ത്രോത്ത് വലിയവീട്ടില്‍ മഠത്തില്‍ 21 പേരാണ് വ്രതമെടുത്ത് മഠത്തില്‍ കയറിയത്. കൈതേരി നാരായണന്‍ നമ്പ്യാരുടെ നേതൃത്വത്തില്‍ കലശം കുളിച്ച സംഘം ആചാരാനുഷ്ഠാനങ്ങളോടെ 5 ദിവസം മഠത്തില്‍ തങ്ങും. 23 ന് ചെനക്കല്‍ ആരംഭിക്കും 24 ന് നെയ്യ്‌ക്കിണ്ടി പിരിക്കാനുള്ള കയര്‍ പിരിക്കും. 25 ന് നെയ്യ് നിറച്ച് 26 ന് കാല്‍നടയായി യാത്ര തിരിക്കുന്നു. 28 ന് അര്‍ദ്ധരാത്രിയാണ് നെയ്യാട്ടം.
