മാഞ്ചസ്റ്റര്: ലോക ഫുട്ബോള് ഹൃദയത്തില് നിന്ന് പറിച്ചെറിയാനാവാത്ത മാഞ്ചസ്റ്റര് യുണൈറ്റഡ് പരിശീലക പദവിയിലെ സ്ഥിരം നിയമനം മൈക്കല് കാരിക്ക് ഉറപ്പിച്ചു. യുണൈറ്റഡിന്റെ സ്ഥിരം പരിശീലകനായി കരാറിലെത്തിയിരിക്കുന്നത് 2028 വരെയാണ്. പ്രീമിയര് ലീഗ് ചരിത്രത്തില് യുണൈറ്റഡ് അതിന്റെ ഏറ്റവും താഴെ തട്ടില് വരെ എത്തിയ അവസരത്തില് നിന്ന് കൈപിടിച്ചുയര്ത്തി സീസണ് അവസാനിക്കുമ്പോള് മൂന്നാം സ്ഥാനത്തെത്തിച്ച മികവ് ഈ പുതിയ കരാറിന് പ്രേരണയായി. അഞ്ച് മാസം മുമ്പ് ഇടക്കാല പരിശീലകനായാണ് കാരിക്ക് തന്റെ മുന് ക്ലബ്ബ് യുണൈറ്റഡില് നിയോഗിക്കപ്പെട്ടത്.
റൂബന് അമോറിമിന് കീഴില് കഴിഞ്ഞ ഡിസംബറില് യുണൈറ്റഡ് പ്രീമിയര് ലീഗ് പട്ടികയില് 14-ാം സ്ഥാനത്തേക്ക് വരെ താഴ്ന്നിരുന്നു. അവിടെ നിന്നാണ് കാരിക്കിന് കീഴില് പൊരുതിക്കയറിയെത്തിയത്. ഇംഗ്ലീഷുകാരനായ കാരിക്ക് 2018 വരെ യുണൈറ്റഡിന്റെ താരമായിരുന്നു. പിന്നീട് കോച്ചിങ് കരിയറിലേക്ക് മാറി. ഒലെ ഗുണാര് സുള്ജേര് യുണൈറ്റഡ് പരിശീലകനായിരിക്കെ സഹ പരിശീലകനായി പ്രവര്ത്തിച്ചിട്ടുണ്ട്. ആ സമയത്ത് 2021ല് മൂന്ന് മത്സരങ്ങളില് ടീമിനെ നിയന്ത്രിക്കാന് അവസരവും ലഭിച്ചിരുന്നു. അതിന്റെ അനുഭവ സമ്പത്തിന്റെ അടിസ്ഥാനത്തിലാണ് യുണൈറ്റഡ് മാനേജ്മെന്റ് റൂബന് അമോറിമിനെ പുറത്താക്കിയപ്പോള് സീസണ് എങ്ങനെയെങ്കിലും തള്ളി നീക്കണം എന്ന തീരുമാനത്തോടെ കാരിക്കിന് അവസരം നല്കിയത്. കഴിഞ്ഞ ജനുവരി മുതല് പ്രീമിയര് ലീഗില് യുണൈറ്റഡ് നടത്തിയ മുന്നേറ്റം അത്ഭുതാവഹമായിരുന്നു.
20 വര്ഷം മുമ്പാണ് ഞാന് യുണൈറ്റഡിന്റെ ഭാഗമാകുന്നത്. എനിക്കറിയാം ഈ ക്ലബ്ബിന്റെ മാസ്മരികത. ഈ ഉത്തരവാദിത്തം ശിരസ്സിലേറ്റുന്നതിന് അഭിമാനം കൂടിയുണ്ട്. കഴിഞ്ഞ അഞ്ച് മാസംകൊണ്ട് താരങ്ങള് തെളിയിച്ചുകഴിഞ്ഞു തിരിച്ചുവരവിനും ഒത്തിണക്കത്തിനും അര്പ്പണബോധത്തിനുമുള്ള ശേഷി വേണ്ടുവോളം ഉണ്ടെന്ന്. മുന്നോട്ടുള്ള പ്രയാണം യുണൈറ്റഡ് താരങ്ങളും പ്രവര്ത്തകരും മാത്രമല്ല ടീം ആരാധകരും അര്ഹിക്കുന്നുണ്ട്. ക്ലബ്ബുമായുള്ള പുതിയ കരാര് ഒപ്പിട്ടുകൊണ്ട് കാരിക്ക് പറഞ്ഞു.
