പത്തനംതിട്ട : കോഴഞ്ചേരി ജില്ലാ ആശുപത്രിയിലെ ചികിത്സാപ്പിഴവില് അന്വേഷണം നടത്തി ആരോഗ്യമന്ത്രി കെ മുരളീധരന് സമര്പ്പിക്കുമെന്ന് പത്തനംതിട്ട ഡിഎംഒ. ഇതിനായി മെഡിക്കല് ബോര്ഡ് രൂപീകരിക്കുമെന്ന് ഡിഎംഒ അനിതാകുമാരി അറിയിച്ചു.
ഏകദേശം ഒരു വര്ഷം മുമ്പ് പനിയും ഛര്ദിയും വയറിളക്കവും ഉണ്ടായതോടെയാണ് ആറന്മുള സ്വദേശിനി വത്സല കോഴഞ്ചേരി ജില്ലാ ആശുപത്രിയില് ചികിത്സ തേടിയത്. ചികിത്സയുടെ ഭാഗമായി കുത്തിവെപ്പ് നല്കി.
പിന്നാലെ കുത്തിവെപ്പ് എടുത്ത ഇടുപ്പിന്റെ ഭാഗത്ത് നിരന്തരം വേദന അനുഭവപ്പെട്ടു. ആദ്യം കാര്യമാക്കിയില്ല. എന്നാല് പിന്നീട് വേദന അസഹനീയമാവുകയും കുത്തിവെപ്പ് എടുത്ത സ്ഥലത്ത് നീര്ക്കെട്ടും പഴുപ്പും ഉണ്ടാവുകയും ചെയ്തു. ഇതോടെ നാല് ദിവസം മുമ്പ് വീണ്ടും കോഴഞ്ചേരി ജില്ലാ ആശുപത്രിയിലെത്തി എക്സ്-റേ എടുത്തതില് സൂചി ശരീരത്തില് കുടുങ്ങിയതായി കണ്ടു.
സൂചി പുറത്തെടുക്കാന് ശസ്ത്രക്രിയ നടത്തിയെങ്കിലും വിജയിച്ചില്ല. സൂചിയുടെ ഒരു ഭാഗം മാത്രമാണ് പുറത്തെടുക്കാന് കഴിഞ്ഞത്.ആശുപത്രിയില് നിന്ന് കുത്തിവെപ്പ് നടത്തിയപ്പോള് സൂചി കുടുങ്ങിയതാണോ എന്ന് പറയാന് കഴിയില്ലെന്ന നിലപാടിലാണ് അധികൃതര്. കൂടുതല് പരിശോധന നടത്തിയാലേ കാര്യങ്ങളില് വ്യക്തത വരികയുളളൂവെന്ന് ആശുപത്രി സൂപ്രണ്ട് പറഞ്ഞു. എന്നാല് ഒരു വര്ഷത്തിനു മുമ്പ് കോഴഞ്ചേരി ജില്ലാ ആശുപത്രിയില് ചികിത്സ തേടിയത് അല്ലാതെ മറ്റെവിടെയും ചികിത്സയ്ക്കായി പോയിട്ടില്ലെന്ന് വത്സലയും കുടുംബവും പറഞ്ഞു.
