തിരുവനന്തപുരം: ഈഴവനായതുകൊണ്ട് മാത്രം ഒ.ജനീഷ് കുമാര്‍ മന്ത്രിയായെന്ന മറുനാടന്‍ മലയാളിയുടെ ഷാജന്‍ സ്കറിയയ്ക്ക് ചുട്ടമറുപടിയുമായി മുന്‍ ഡിജിപി ഡോ. ടി.പി. സെന്‍കുമാര്‍. 32 ശതമാനം ഈഴവര്‍ക്കും ഒബിസികള്‍ക്കും മൂന്ന് മന്ത്രി, 18 ശതമാനം ക്രിസ്ത്യാനികള്‍ക്ക് ആറ് മന്ത്രി…നല്ല ബാലന്‍സിങ്ങ്” എന്നായിരുന്നു ഡോ. ടി.പി. സെന്‍കുമാറിന്റെ ചുട്ട മറുപടി.
മാത്യു കുഴല്‍നാടന്‍ ഉള്‍പ്പെടെയുള്ള കോണ്‍ഗ്രസിലെ പലരും എന്തുകൊണ്ട് മന്ത്രിയായില്ലെന്നും ഒ.ജെ. ജനീഷ് കുമാര്‍ എന്തുകൊണ്ട് മന്ത്രിയായെന്നും വിശദീകരിക്കാന്‍ ശ്രമിച്ചുകൊണ്ട് ഷാജന്‍ സ്കറിയ ഇട്ട പോസ്റ്റ് വലിയ തിരിച്ചടിയായി മാറി.
ഷാജന്‍ സ്കറിയയുടെ പോസ്റ്റ് ഇപ്രകാരമായിരുന്നു: “മാത്യു കുഴന്‍നാടനും എം.വിന്‍സെന്‍റും ക്രിസ്ത്യാനികള്‍ ആയതിനാല്‍ മന്ത്രി ആയില്ല. അന്‍വര്‍ സാദത്തും ഷാനിമോള്‍ ഉസ്മാനും മുസ്ലിം ആയതുകൊണ്ട് മന്ത്രിമാരായില്ല. വി.ടി. ബലറാം സവര്‍ണ്ണ ഹിന്ദു ആയതുകൊണ്ട് മന്ത്രി ആയില്ല. വി.പി. സജീന്ദ്രന്‍ ദളിതന്‍ ആയതുകൊണ്ട് മന്ത്രി ആയില്ല. ഒ.ജെ ജനീഷ് ഈഴവനായതുകൊണ്ട് മാത്രം മന്ത്രിയായി. ഇവരുടെ ഒക്കെ ജാതി മതം മറ്റൊന്നായിരുന്നെങ്കില്‍ ഇവര്‍ മന്ത്രി ആകുമായിരുന്നു. മതേതര-പരിഷ്കൃത സമൂഹം എന്ന് സ്വയം അവകാശപ്പെടുന്ന നമ്മുടെ നാട്ടിലെ യാഥാര്‍ത്ഥ്യം ഇങ്ങിനെയൊക്കെ ആണെന്ന് എത്ര പേര്‍ തിരിച്ചറിയുന്നുണ്ട്. ”
ഷാജന്‍ സ്കറിയയുടെ ഈ പോസ്റ്റിന് മറുപടിയായാണ് ഡോ. ടി.പി. സെന്‍കുമാറിന്റെ പോസ്റ്റ് വന്നത്. അതിപ്രകാരമാണ്: “അതെ, 25 ശതമാനമുള്ള ഈഴവര്‍ക്കും മറ്റ് ഒബിസികള്‍ക്കും (ആകെ 32 ശതമാനം വരും) മൂന്ന് മന്ത്രിയും 18 ശതമാനം ഉള്ള ക്രിസ്ത്യന്‍സിന് ആറ് മന്ത്രിമാരും…നല്ല ബാലന്‍സിങ്ങ്”. സണ്ണി ജോസഫ്, റോജി എം. ജോണ്‍, മോണ്‍സ് ജോസഫ്, അനൂപ് ജേക്കബ്, ഷിബു ബേബി ജോണ്‍, സി.പി. ജോണ്‍ എന്നിവരാണ് ക്രിസ്ത്യന്‍ സമുദായത്തില്‍ നിന്നുള്ള ഈ ആറ് മന്ത്രിമാര്‍.
26.56 ശതമാനം ജനസംഖ്യയുള്ള മുസ്ലിം സമുദായത്തിന് ആറ് മന്ത്രിമാരാണ് ലഭിച്ചത്. ഷാജന്‍സ്കറിയയുടെ പോസ്റ്റും അതിന് ഡോ. ടി.പി. സെന്‍കുമാര്‍ നല‍്കിയ മറുപടിയും സമൂഹമാധ്യമങ്ങളില്‍ വൈറലാണ്.
