കൊച്ചി: വിവാദമായ വൈറല് താരത്തിന്റെ വിവാഹക്കേസില് പ്രതികള് ജാമ്യം തേടി മധ്യപ്രദേശിലെ കോടതിയേയാണ് സമീപിക്കേണ്ടതെന്ന് മധ്യപ്രദേശ് സര്ക്കാര് കേരള ഹൈക്കോടതിയില് വ്യക്തമാക്കി.
കുംഭമേളയില് മാല വിറ്റ് സോഷ്യല് മീഡിയ വഴി പ്രശസ്തയായ മധ്യപ്രദേശുകാരിയും വനവാസിയുമായ പ്രായപൂര്ത്തിയാകാത്ത പെണ്കുട്ടിയെ കേരളത്തില് എത്തിച്ച് വിവാഹം ചെയ്ത ഫര്മാന് ഖാന് പോക്സോ കേസില് മുന്കൂര് ജാമ്യം തേടി കേരള ഹൈക്കോടതിയെ സമീപിച്ചിരുന്നു. ഇതുമായി ബന്ധപ്പെട്ട കേസ് പരിഗണിക്കവേയാണ് മധ്യപ്രദേശ് സര്ക്കാര് നിലപാട് വ്യക്തമാക്കിയത്.
പോക്സോ കേസ് അടക്കമുള്ളത് എടുത്തിരിക്കുന്നത് മധ്യപ്രദേശിലാണ്. അതിനാല് പെണ്കുട്ടിയും ഫര്മാന് ഖാനും മധ്യപ്രദേശിലെ, കേസിന്റെ പരിധിയിലുളള കോടതിയെയാണ് സമീപിക്കേണ്ടിയിരുന്നത് കേരള ഹൈക്കോടതിയേയല്ല. മധ്യപ്രദേശ് സര്ക്കാരിന് വേണ്ടി ഹാജരായ കേന്ദ്രസര്ക്കാരിന്റെ അഡീ. സോളിസിറ്റര് ജനറല് എസ്.വി. രാജു കേരള ഹൈക്കോടതിയില് പറഞ്ഞു.
ജാമ്യത്തിന് അവര് മധ്യപ്രദേശിലെ കോടതിയെ എന്തുകൊണ്ടാണ് സമീപിക്കാത്തത്? എന്തിനാണ് അവര് കേരള ഹൈക്കോടതിയെ സമീപിച്ചത്? രാജു ആരാഞ്ഞു. മധ്യപ്രദേശിലെ രേഖകളില് കൃത്രിമം കാട്ടുമെന്ന് ആരോപിച്ച് പെണ്കുട്ടിയും ഫര്മാന് ഖാനും അവിടുത്തെ കോടതിയില് പരാതി നല്കിയിട്ടുണ്ട്. ഈ സാഹചര്യത്തില് ജാമ്യഹര്ജിയും അവിടെ നല്കാന് സാധിക്കുമായിരുന്നില്ലേ. അദ്ദേഹം ചോദിച്ചു.
അങ്ങനെയെങ്കില് പ്രഥമ വിവര റിപ്പോര്ട്ട് നല്കാന് ഹൈക്കോടതി നിര്ദേശിച്ചു. കേസ് എടുത്ത സ്ഥലത്തെ കോടതിയില് മുന്കൂര് ജാമ്യാപേക്ഷ നല്കണമെന്നാണ് സുപ്രീംകോടതി നിര്ദേശവും. പക്ഷെ ന്യായീകരിക്കത്തക്ക കാരണങ്ങള് ഉണ്ടെങ്കില് മറ്റ് എവിടെയെങ്കിലും സമീപിക്കാമെന്നും വിധിയിലുണ്ട്. ജസ്റ്റിസ് കൗസര് എടപ്പഗത്ത് പറഞ്ഞു. മുന്കൂര് ജാമ്യ ഹര്ജി ഈ മാസം 29ലേക്ക് മാറ്റിയ കോടതി അതുവരെ ഫര്മാന് ഖാനെ അറസ്റ്റ് ചെയ്യുന്നത് തടഞ്ഞു. കേസില് എസ്.വി. രാജുവും സ്പെഷല് പ്രോസിക്യൂട്ടര് അഡ്വ. വി. സജിത് കുമാറുമാണ് മധ്യപ്രദേശ് സര്ക്കാരിന് വേണ്ടി കേരള ഹൈക്കോടതിയില് ഹാജരാകുന്നത്.
