തിരുവനന്തപുരം: സ്റ്റുഡന്റ് പോലീസ് കേഡറ്റുകളുടെ അച്ചടക്കവും സമൂഹത്തിനോടുള്ള പ്രതിബദ്ധതയും രാജ്യത്തിന് മാതൃകയാണെന്ന് ഗവര്‍ണര്‍ രാജേന്ദ്ര വിശ്വനാഥ് ആര്‍ലേക്കര്‍ പറഞ്ഞു. സ്റ്റുഡന്റ് പോലീസ് കേഡറ്റുകളുടെ സംസ്ഥാനതല സഹവാസ ക്യാമ്പ് ‘ഐക്യ 2026’ വെങ്ങാനൂര്‍ വിപിഎസ് മലങ്കര ഹയര്‍ സെക്കന്‍ഡറി സ്‌കൂളില്‍ ഉദ്ഘാടനം ചെയ്യുകയായിരുന്നു അദ്ദേഹം.
യുവതലമുറയെ വാര്‍ത്തെടുക്കുന്നതില്‍ സ്റ്റുഡന്റ് പോലീസ് കേഡറ്റ് പോലൊരു പദ്ധതി വേറെയില്ല. എസ്പിസി ദേശീയ തലത്തില്‍ നടപ്പാക്കേണ്ടതാണ്. ആറ് ദിവസത്തെ ക്യാമ്പ് കേഡറ്റുകളെ പുതിയ വ്യക്തികളാക്കി മാറ്റുമെന്നും അദ്ദേഹം പറഞ്ഞു.
ലിംഗ, മത, ജാതിഭേദങ്ങളില്ലാതെ വിദ്യാര്‍ത്ഥികളെ മുന്നേറ്റത്തിന്റെ പാതയില്‍ ഒരുമിപ്പിക്കാന്‍ ക്യാമ്പിന് കഴിയുമെന്ന് ഡിജിപി റവാഡ ചന്ദ്രശേഖര്‍ പറഞ്ഞു. സംസ്ഥാനത്തെ വിവിധ ജില്ലകളില്‍ നിന്നായി തെരഞ്ഞെടുക്കപ്പെട്ട 939 കേഡറ്റുകളാണ് ആറ് ദിവസത്തെ വാര്‍ഷിക റെസിഡന്‍ഷ്യല്‍ ക്യാമ്പില്‍ പങ്കെടുക്കുന്നത്. മേയ് 25ന് പരേഡോടെ സമാപിക്കും.
