മോസ്കോ : റഷ്യയുടെ ഡ്രോണ്‍ ആക്രമണത്തിന് പ്രതികാരമായി റഷ്യതലസ്ഥാനമായ മോസ്കോയിലേക്ക് ആയിരത്തില്‍ പരം ഡ്രോണുകള്‍ അയച്ചുകൊണ്ടുള്ള ഉക്രൈന്റെ പ്രത്യാക്രമണത്തില്‍ ഒരു ഇന്ത്യക്കാരന്‍ കൊല്ലപ്പെട്ടു. ആകെ നാല് പേര് കൊല്ലപ്പെട്ടിരുന്നു. ഇതില്‍ മൂന്ന് പേര് റഷ്യക്കാരാണ്. മൂന്ന് ഇന്ത്യക്കാര്‍ക്ക് പരിക്കേറ്റു. പരിക്കേറ്റവരുടെ നില ഗുരുതരമാണ്.
റഷ്യയിലെ ഇന്ത്യന്‍ എംബസി ഉദ്യോഗസ്ഥര്‍ സംഭവസ്ഥലത്തെത്തി മരണം സ്ഥിരീകരിച്ചു. മെയ് 16ാം തീയതി മരിച്ചയാളുടെ പേര് വെളിപ്പെടുത്തിയിട്ടില്ല. ഇക്കഴിഞ്ഞ മാസങ്ങളിലെ ഏറ്റവും വലിയ ഡ്രോണ്‍ ആക്രമണമായിരുന്നു ഉക്രൈന്‍ റഷ്യയ്‌ക്ക് നേരെ നടത്തിയത്. ഏകദേശം 550ഓളം ഡ്രോണുകള്‍ നിര്‍വ്വീര്യമാക്കിയെന്ന് റഷ്യ അറിയിച്ചു.
കഴിഞ്ഞ ദിവസം റഷ്യ 800ല്‍ പരം ഡ്രോണുകള്‍ അയച്ച് ഉക്രൈനെതിരെ നടത്തിയ ആക്രമണത്തില്‍ നാല് പേര് കൊല്ലപ്പെട്ടിരുന്നു. ഡ്രോണ്‍ ആക്രമണം മൂലം വന്‍നാശനഷ്ടമാണ് ഉക്രൈന്‍ തലസ്ഥാനമായ കീവില്‍ ഉണ്ടായത്. കീവില്‍ മാത്രമല്ല, ലിവിവ്, ഒഡേസ തുറമുഖം എന്നിവ ഉള്‍പ്പെടെ 20 പ്രദേശങ്ങളില്‍ ആക്രമണം നടത്തിയിരുന്നു.
