ന്യൂദല്‍ഹി: പ്രതിപക്ഷ നേതാവ് രാഹുല്‍ ഗാന്ധി എംപിയായതു മുതല്‍ വിദേശയാത്രാ വിവരങ്ങള്‍ ഔദ്യോഗികമായി പങ്കുവയ്‌ക്കുന്നില്ലെന്ന് കേന്ദ്ര പാര്‍ലമെന്ററികാര്യ മന്ത്രി കിരണ്‍ റിജിജു. പ്രോട്ടോക്കോള്‍ ഒന്നും പാലിക്കാതെ രാഹുല്‍ എവിടെയാണ് താമസിക്കുന്നത്, ആരെയാണ് കാണുന്നതെന്ന വിവരങ്ങളും ലഭ്യമാക്കുന്നില്ല. 2004 നും 2026 നും ഇടയില്‍ 54 തവണ അദ്ദേഹം വിദേശ യാത്രകള്‍ നടത്തിയിട്ടുണ്ട്. വിദേശത്ത് നിന്നുള്ളവര്‍ സ്‌പോണ്‍സര്‍ ചെയ്ത ആതിഥേയത്വം സ്വീകരിക്കണമെങ്കില്‍ വിവരങ്ങള്‍ നല്‍കണമെന്നാണ് ചട്ടമെന്നും റിജിജു പറഞ്ഞു.
ഏതെങ്കിലും എംപി വിദേശത്തേക്ക് പോകുകയാണെങ്കില്‍, മൂന്നാഴ്ച മുമ്പ് ലോക്‌സഭയ്‌ക്കോ രാജ്യസഭയ്‌ക്കോ വിവരം കൈമാറണം. വിദേശകാര്യ-ആഭ്യന്തര മന്ത്രാലയത്തെയും അറിയിക്കണം, അതാണ് ചട്ടമെന്നും റിജിജു പറഞ്ഞു. രാഹുലിന്റെ പിറകേ പോകാന്‍ ഞങ്ങള്‍ ഉദ്ദേശിക്കുന്നില്ല. എന്നാല്‍ നികുതിപ്പണം ഉപയോഗിക്കുമ്പോള്‍ തീര്‍ച്ചയായും ചോദ്യങ്ങള്‍ ഉയര്‍ന്നുവരും. രാഹുലിന് സുരക്ഷ നല്‍കുന്ന ഏജന്‍സികളെ ഇത് ആശങ്കയിലാക്കുന്നു. അദ്ദേഹത്തിന് എന്തെങ്കിലും സംഭവിച്ചാല്‍ സര്‍ക്കാരാണ് ഉത്തരം പറയേണ്ടതെന്നും റിജിജു ചൂണ്ടിക്കാട്ടി.
കഴിഞ്ഞ ദിവസം ബിജെപി ദേശീയ വക്താവ് സംബിത് പത്ര രാഹുലിന്റെ ദുരൂഹമായ വിദേശയാത്രകളെ കുറിച്ച് ചോദ്യം ഉന്നയിച്ചിരുന്നു. കഴിഞ്ഞ 22 വര്‍ഷത്തിനിടെ വിദേശയാത്രകള്‍ക്കായി രാഹുല്‍ ചിലവഴിച്ചത് 60 കോടി രൂപയാണെന്നാണ് അദ്ദേഹം പറഞ്ഞത്.
