തിരുവനന്തപുരം: കേരള ജല അതോറിട്ടിയില്‍ സ്ഥലംമാറ്റ വ്യവസ്ഥകളും തസ്തികകളുടെ ആവശ്യകതയും അട്ടിമറിച്ച് നടപ്പിലാക്കിവന്ന നൂറുകണക്കിന് അനധികൃത ‘വര്‍ക്കിങ് അറേഞ്ച്‌മെന്റ്’ ഉത്തരവുകള്‍ റദ്ദാക്കുന്നു.
കേരള വാട്ടര്‍ അതോറിറ്റി എംപ്ലോയീസ് സംഘ് ഉന്നയിച്ച പരാതികളെത്തുടര്‍ന്നാണ് റദ്ദാക്കല്‍. കഴിഞ്ഞ ഫെബ്രുവരിയില്‍ മാനേജിങ് ഡയറക്ടര്‍ പി.ബി. നൂഹ് കര്‍ശന നിര്‍ദേശം നല്‍കിയിട്ടും നടപടി വൈകിപ്പിച്ച ഉദ്യോഗസ്ഥര്‍ക്ക് തിരിച്ചടിയായത് ബിഎംഎസ് വിവരാവകാശം നല്‍കിയതിലൂടെ.
ജല അതോറിറ്റിയുടെ വിവിധ ഓഫീസുകളില്‍ ജോലിഭാരത്തിന് അനുസൃതമായി അനുവദിച്ചിട്ടുള്ള തസ്തികകള്‍ അപ്രസക്തമാക്കിയാണ്, സ്വാധീനമുള്ളവര്‍ക്കായി വര്‍ക്കിങ് അറേഞ്ച്‌മെന്റുകള്‍ നല്‍കിയത്. ഇതുമൂലം അര്‍ഹരായ ജീവനക്കാരുടെ പൊതുസ്ഥലംമാറ്റം പൂര്‍ണമായും അട്ടിമറിക്കപ്പെട്ടു. സീനിയോറിറ്റി മറികടന്ന് ഉന്നത ഉദ്യോഗസ്ഥരുടെ താല്പര്യപ്രകാരം ഇഷ്ടക്കാര്‍ക്ക് താത്പര്യമുള്ള പ്രദേശങ്ങളില്‍ നിയമനം നല്‍കി. ദൂരസ്ഥലങ്ങളില്‍ ജോലി ചെയ്യുന്ന സാധാരണ ജീവനക്കാര്‍ക്ക് തങ്ങളുടെ നാട്ടിലേക്ക് വരാനുള്ള അവസരം ഇല്ലാതായി. പൊതുസ്ഥലംമാറ്റം അട്ടിമറിക്കുന്നവര്‍ക്ക് നീതി ലഭിക്കുന്നതുവരെ പൊരുതുമെന്ന് കേരള വാട്ടര്‍ അതോറിറ്റി എംപ്ലോയീസ് സംഘ് (ബിഎംഎസ്) ജനറല്‍ സെക്രട്ടറി പി. പ്രദീപ് പറഞ്ഞു.
