തിരുവനന്തപുരം: കെ.സി. വേണുഗോപാല്‍ എംപിയെ എഐസിസി അധ്യക്ഷ പദവി സ്ഥാനത്തേക്ക് പരിഗണിക്കാന്‍ കോണ്‍ഗ്രസ് ഹൈക്കമാന്‍ഡ് തീരുമാനം. ഇക്കാര്യത്തില്‍ നടപടി വൈകാതെ ഉണ്ടാകുമെന്നാണ് വിവരം.
കേരളത്തിലെ മുഖ്യമന്ത്രി സ്ഥാനം സംബന്ധിച്ച വിഷയത്തില്‍ ഹൈക്കമാന്‍ഡിന്റെ അനുനയത്തിന് ഒരു ഘട്ടത്തിലും വഴങ്ങാതിരുന്ന കെ.സി.വേണുഗോപാല്‍ ഒടുവില്‍ തന്റെ അവകാശവാദങ്ങളില്‍ നിന്നും മാറി നിന്നത് രാഹുല്‍ഗാന്ധി ഉള്‍പ്പെടെ നല്‍കിയ ഉറപ്പിന്മേല്‍ ആണെന്നാണ് വിവരം.എഐസിസി സംഘടനാ ചുമതലയുള്ള ജനറല്‍ സെക്രട്ടറിയാണ് നിലവില്‍ കെ സി.
വ്യാഴാഴ്ച രാവിലെ രാഹുല്‍ ഗാന്ധിയും വേണുഗോപാലും തമ്മില്‍ നടത്തിയ ചര്‍ച്ചയില്‍ എഐസിസി അധ്യക്ഷ പദവി സംബന്ധിച്ച വിഷയത്തില്‍ ഏതാണ്ട് തീരുമാനമായിട്ടുണ്ട്. നിലവിലെ എഐസിസി അധ്യക്ഷന്‍ മല്ലികാര്‍ജുന ഖാര്‍ഗെ ആരോഗ്യ പ്രശ്‌നങ്ങളാല്‍ സ്ഥാനമൊഴിയുമ്പോള്‍ കെ സി ഈ പദവിയിലെത്തും.
2022 ല്‍ എഐസിസി അധ്യക്ഷനായ 84 കാരായ ഖര്‍ഗെക്ക് ആരോഗ്യപ്രശ്‌നങ്ങള്‍ മൂലം ദീര്‍ഘ യാത്രകള്‍ക്കും ചര്‍ച്ചകള്‍ക്കും ബുദ്ധിമുട്ടുണ്ട്. ഈ പശ്ചാത്തലത്തിലാണ് കോണ്‍ഗ്രസിന്റെ ഏറ്റവും ഉന്നത പദവി കെ.സിയ്‌ക്ക് വാഗ്ദാനം ചെയ്തിരിക്കുന്നത്.
ഹൈക്കമാന്‍ഡ് മുന്‍കൈയെടുത്ത് കേരളത്തില്‍ രണ്ട് ദിവസം മുമ്പ് നടത്തിയ അവസാനഘട്ട സര്‍വേയുടെ ഫലം പൂര്‍ണമായും തനിക്കെതിരാണെന്ന് കെ സി മനസിലാക്കിയിരുന്നു.ഇതും അധ്യക്ഷപദവി ഏതാണ്ട് ഉറപ്പാക്കുകയും ചെയ്തതോടെയാണ് കെ സി മുഖ്യമന്ത്രി ആകണമെന്ന ആവശ്യത്തില്‍ നിന്ന് പിന്മാറിയത്.
പുറമെ കേരളത്തിലെ മന്ത്രിസഭയില്‍ ആറ് മന്ത്രിമാരെയും ചോദിക്കുന്ന വകുപ്പും കെ.സി. ഗ്രൂപ്പിന് വാഗ്ദാനം ചെയ്തതായാണ് പറഞ്ഞ് കേള്‍ക്കുന്നത്.
