ബംഗാളില്‍ സുവേന്ദു അധികാരിയുടെ നേതൃത്വത്തില്‍ ബിജെപി സര്‍ക്കാര്‍ രൂപീകരിച്ചത് രാജ്യത്തിന്റെ രാഷ്ട്രീയ ചരിത്രത്തിലെ നിര്‍ണായക വഴിത്തിരിവാണ്. ദീര്‍ഘകാലമായി പ്രാദേശിക പാര്‍ട്ടികളുടെ ആധിപത്യം നിലനിന്നിരുന്ന ഒരു സംസ്ഥാനത്ത് ജനങ്ങള്‍ വികസനത്തിനും അഴിമതിരഹിത ഭരണത്തിനും രാഷ്ട്രീയ സ്ഥിരതയ്‌ക്കും വേണ്ടി വോട്ട് ചെയ്തതിന്റെ പ്രതിഫലനമാണ് ഈ വിജയം.
ഈ രാഷ്ട്രീയ മാറ്റം ബംഗാളിനേക്കാള്‍ വലിയ സന്ദേശമാണ് കേരളത്തിനും നല്‍കുന്നത്. വര്‍ഷങ്ങളായി ഇടതുപക്ഷവും കോണ്‍ഗ്രസും മാറിമാറി ഭരിച്ചുകൊണ്ടിരിക്കുന്ന കേരളത്തില്‍ ജനങ്ങള്‍ ഇപ്പോള്‍ ഒരു പുതിയ രാഷ്ട്രീയ സാധ്യതയെക്കുറിച്ച് ചിന്തിക്കാന്‍ ആരംഭിച്ചിരിക്കുകയാണ്. ദേശീയ വികസന കാഴ്ചപ്പാടും ശക്തമായ ഭരണനേതൃത്വവും ജനങ്ങള്‍ കൂടുതല്‍ പ്രാധാന്യത്തോടെ വിലയിരുത്തുന്ന കാലഘട്ടമാണിത്.
പ്രധാനമന്ത്രി നരേന്ദ്ര മോദിയുടെ നേതൃത്വത്തില്‍ രാജ്യത്ത് നടപ്പിലാക്കിയ വികസന പദ്ധതികള്‍ ജനങ്ങളില്‍ വലിയ സ്വാധീനം ചെലുത്തിയിട്ടുണ്ട്. ദേശീയപാത വികസനം, വന്ദേഭാരത് ട്രെയിനുകള്‍, ഡിജിറ്റല്‍ ഇന്ത്യ, ഉജ്ജ്വല പദ്ധതി, ജല്‍ജീവന്‍ മിഷന്‍, പിഎം ആവാസ് യോജന, ആരോഗ്യരംഗത്തെ ആയുഷ്മാന്‍ ഭാരത് പദ്ധതികള്‍ തുടങ്ങിയവ സാധാരണ ജനങ്ങളുടെ ജീവിതത്തില്‍ മാറ്റങ്ങള്‍ സൃഷ്ടിച്ചു. കേന്ദ്ര പദ്ധതികളുടെ ഗുണഫലങ്ങള്‍ നേരിട്ട് ജനങ്ങളിലെത്തുന്ന സാഹചര്യം കേരളത്തിലും രാഷ്ട്രീയ ചര്‍ച്ചകള്‍ക്ക് വഴിതെളിച്ചിരിക്കുകയാണ്.
ബംഗാളിനെ അസ്ഥിരപ്പെടുത്തിയ രാഷ്ട്രീയ അതിക്രമങ്ങള്‍ അഴിമതി, നിയമന തട്ടിപ്പുകള്‍, ഭരണകൂടത്തിന്റെ രാഷ്‌ട്രീയവത്കരണം തുടങ്ങിയ വിഷയങ്ങള്‍ ജനവിധിയെ ശക്തമായി സ്വാധീനിച്ചു. അധ്യാപക നിയമന അഴിമതി, കല്‍ക്കരി-കന്നുകാലി കടത്ത് വിവാദങ്ങള്‍, കേന്ദ്ര ഏജന്‍സികളുടെ അന്വേഷണങ്ങള്‍ എന്നിവ ഭരണത്തോടുള്ള ജനവിശ്വാസത്തെ ബാധിച്ചു.
കേരളത്തിലും വിവിധ കോഴ വിവാദങ്ങള്‍, സ്വര്‍ണക്കടത്ത് കേസ്, മാസപ്പടി ആരോപണങ്ങള്‍, നിയമന തര്‍ക്കങ്ങള്‍, സഹകരണ ബാങ്ക് വിവാദങ്ങള്‍, യുവാക്കളുടെ തൊഴിലില്ലായ്‌മ, കടുത്ത സാമ്പത്തിക പ്രതിസന്ധി എന്നിവയില്‍ ജനത്തിന് ആശങ്കയുണ്ട്. സംസ്ഥാനത്തിന്റെ പൊതുകടം വര്‍ധിച്ചുകൊണ്ടിരിക്കുന്നു. ധനകാര്യ നിയന്ത്രണങ്ങളാല്‍ ക്ഷേമപദ്ധതികള്‍ പോലും പ്രതിസന്ധിയിലാകുന്ന അവസ്ഥ രൂപപ്പെട്ടിട്ടുണ്ട്. കേരളത്തിലെ വിദ്യാഭ്യാസമുള്ള യുവാക്കള്‍ വലിയ തോതില്‍ വിദേശരാജ്യങ്ങളിലേക്കും മറ്റു സംസ്ഥാനങ്ങളിലേക്കും തൊഴില്‍ തേടി പോകുകയാണ്. വ്യവസായ നിക്ഷേപ രംഗത്തും കേരളം പ്രതീക്ഷിച്ചപോലെ വളര്‍ച്ച കൈവരിച്ചിട്ടില്ല. പല വലിയ കമ്പനികളും നിയമ-തൊഴിലാളി പ്രശ്‌നങ്ങളും രാഷ്ട്രീയ അനിശ്ചിതത്വവും കാരണം മറ്റ് സംസ്ഥാനങ്ങളിലേക്കാണ് നീങ്ങുന്നത്. ഇതെല്ലാം ജനങ്ങളെ പുതിയ രാഷ്ട്രീയ സാധ്യതകളെക്കുറിച്ച് ചിന്തിക്കാന്‍ പ്രേരിപ്പിക്കുന്നു.
ബംഗാളിലെ രാഷ്ട്രീയ മാറ്റം അവിടെ മാത്രം ഒതുങ്ങുന്ന സംഭവമല്ല; രാജ്യത്തെ ജനാധിപത്യ മനോഭാവത്തിന്റെ പ്രതിഫലനമാണ്. അഴിമതി നിറഞ്ഞ ഒരു സര്‍ക്കാരിന്റെ ദീര്‍ഘകാല ഭരണത്തില്‍ ജനം അസന്തുഷ്ടരാകുമ്പോള്‍ മാറ്റം അനിവാര്യമാണെന്ന് ഈ തെരഞ്ഞെടുപ്പ് വീണ്ടും തെളിയിച്ചിരിക്കുന്നു. കേരളത്തിലും ജനം ഇന്ന് കൂടുതല്‍ വികസനകേന്ദ്രിതമായ രാഷ്‌ട്രീയത്തെ വിലയിരുത്തുന്നു. ദേശീയത, വികസനം, അഴിമതിവിരുദ്ധ നിലപാട്, യുവജന തൊഴിലവസരങ്ങള്‍, അടിസ്ഥാന സൗകര്യ വികസനം, സ്ത്രീ ശാക്തീകരണം എന്നിവയാണ് ഭാവിയിലെ രാഷ്ട്രീയ ചര്‍ച്ചകളെ നിര്‍ണയിക്കാന്‍ പോകുന്നത്.
ബംഗാളില്‍ ബിജെപിയുടെ ഉയര്‍ച്ച കേരളത്തിലെ രാഷ്ട്രീയ പാര്‍ട്ടികള്‍ക്കും ഒരു മുന്നറിയിപ്പാണ്. ജനങ്ങളുടെ പ്രതീക്ഷകള്‍ അവഗണിക്കുകയും രാഷ്ട്രീയ അഹങ്കാരം തുടരുകയും ചെയ്താല്‍ ശക്തമായ രാഷ്ട്രീയ മാറ്റങ്ങള്‍ ഉണ്ടാകാമെന്ന് ചരിത്രം പലവട്ടം തെളിയിച്ചിട്ടുണ്ട്.
ജനങ്ങളുടെ വിശ്വാസം നേടിയെടുക്കാന്‍ കഴിയുന്ന, സുതാര്യവും വികസനോന്മുഖവുമായ ഭരണമാണ് ഇനി രാജ്യത്തിന്റെ വിവിധ സംസ്ഥാനങ്ങളില്‍ വിജയത്തിന്റെ അടിസ്ഥാനമാകുക.
(മുന്‍ പാര്‍ലമെന്റ് അംഗമാണ് ലേഖകന്‍)
ജന്മഭൂമി ഓണ്‍ലൈന്‍