മധ്യപ്രദേശ് ഹൈക്കോടതി ജഡ്ജി ജസ്റ്റിസ് ഡി.ഡി. ബന്സാല് സൈക്കിളില് കോടതിയിലേക്ക് പോകുന്നു
ജബല്പൂര്: ആഗോള ഊര്ജ ആശങ്കകള്ക്കിടയില് ഇന്ധന ഉപഭോഗം കുറയ്ക്കണമെന്ന പ്രധാനമന്ത്രി നരേന്ദ്ര മോദിയുടെ ആഹ്വാനം ഏറ്റെടുത്ത് മധ്യപ്രദേശ് ഹൈക്കോടതി ജഡ്ജി. ജസ്റ്റിസ് ഡി.ഡി. ബന്സാല് ആണ് സിവില് ലൈനിലെ പച്ച്പേഡിയിലുള്ള തന്റെ സര്ക്കാര് വസതിയില് നിന്ന് ഹൈക്കോടതിയിലേക്ക് മൂന്ന് കിലോമീറ്ററോളം സൈക്കിള് ചവിട്ടി എത്തിയത്.
തിരക്കേറിയ നഗര റോഡുകളിലൂടെ സൈക്കിള് ചവിട്ടുന്ന ജഡ്ജിയുടെ വീഡിയോ സാമൂഹ്യ മാധ്യമങ്ങളില് ഇതിനോടകം വൈറലായി.
വെല്ലുവിളി നിറഞ്ഞ സമയങ്ങളില്, സാധ്യമായ എല്ലാ വഴികളിലൂടെയും എണ്ണയും ഇന്ധനവും ലാഭിക്കാന് ആളുകള് ശ്രമിക്കണമെന്ന് ഹൈക്കോടതി ജഡ്ജി മാധ്യമപ്രവര്ത്തകരോട്
പറഞ്ഞു.
ഇന്ധന സംരക്ഷണത്തെക്കുറിച്ചുള്ള പ്രധാനമന്ത്രിയുടെ സന്ദേശത്തില് നിന്നാണ് ഇത്തരത്തിലൊരു തീരുമാനം കൈക്കൊണ്ടത്. ഹൈക്കോടതി ജഡ്ജിക്ക് സൈക്കിളില് യാത്ര ചെയ്യാന് കഴിയില്ലെന്ന് ആളുകള് കരുതരുത്. ഇന്ധനം ലാഭിക്കാന് മാത്രമല്ല, ചെറിയ ദൂരം സഞ്ചരിക്കാനുള്ള ലളിതവും ആരോഗ്യകരവുമായ മാര്ഗം കൂടിയാണിതെന്നും അദ്ദേഹം കൂട്ടിച്ചേര്ത്തു.
കോടതി ജോലിക്ക് ആവശ്യമായ ബാഗ്, ടിഫിന്, മറ്റ് പ്രധാന വസ്തുക്കള് എന്നിവയുമായി ഒരു കോടതി ജീവനക്കാരനും സൈക്കിളില് ജഡ്ജിയോടൊപ്പം ഉണ്ട്.
