തിരുവനന്തപുരം: മുഖ്യമന്ത്രി ആരായിരിക്കും എന്നതില് അനിശ്ചിതത്വം തുടരവെ മുഖ്യമന്ത്രി സ്ഥാനം ഉറപ്പിച്ച മട്ടില് കെ സി വേണുഗോപാലിന്റെ ഫേസ്ബുക്ക് പോസ്റ്റ് ചര്ച്ചയായി. മലപ്പുറം മങ്കടയില് ഇടിമിന്നലേറ്റ് മരിച്ച നാലു വിദ്യാര്ഥികളുടെ കുടുംബങ്ങള്ക്ക് കാലവിളംബം ഇല്ലാതെ നഷ്ടപരിഹാരത്തുക നല്കാനുള്ള ഇടപെടല് നടത്തണമെന്ന് ചീഫ് സെക്രട്ടറിയോട് ആവശ്യപ്പെട്ട് കൊണ്ടുള്ള ഫേസ്ബുക് പോസ്റ്റ് ആണ് രാഷ്ട്രീയ രംഗത്ത് ചര്ച്ചയാവുന്നത്.
ചീഫ് സെക്രട്ടറിയോട് ഇത്തരത്തില് ഇടപെടല് ആവശ്യപ്പെടണമെങ്കില് മുഖ്യമന്ത്രി സ്ഥാനം കെ സി വേണുഗോപാലിന് നല്കാന് ഹൈക്കമാന്ഡ് തീരുമാനിച്ച് കാണുമെന്നാണ് രാഷ്ട്രീയ വൃത്തങ്ങളിലെ സംസാരം.
മുഖ്യമന്ത്രി പദവിയിലേക്ക് ഏറ്റവുമധികം പറഞ്ഞു കേള്ക്കുന്ന പേര് കെ സിയുടേതാണ്. അന്തിമഘട്ട ചര്ച്ചകളിലും മുഖ്യമന്ത്രി സ്ഥാനത്തേയ്ക്ക് മുന്നില് നില്ക്കുന്ന പേര് കെ സി വേണുഗോപാലിന്റേത് തന്നെ എന്നാണ് അദ്ദേഹവുമായി അടുത്ത വ്യത്തങ്ങള് പറയുന്നത്.കോണ്ഗ്രസിന്റെ 63 എംഎല്എമാരില് ഏറ്റവും കൂടുതല് പേരും പിന്തുണയ്ക്കുന്നത് കെ സിയെ ആണ്. മുഖ്യമന്ത്രി പദവിയിലേക്ക് കെ സി വേണുഗോപാലിനെ തീരുമാനിച്ച് പ്രഖ്യാപനം വന്നാല് അദ്ദേഹം ഇരിക്കൂറില് മത്സരിച്ചേക്കുമെന്നാണ് കരുതുന്നത്.
ഈ സാഹചര്യത്തിലാണ് ഇടിമിന്നലേറ്റ് നാല് വിദ്യാര്ഥികള് മരിച്ച സംഭവത്തില് വേദന പങ്കുവെച്ചു കൊണ്ടുള്ള വേണുഗോപാലിന്റെ പോസ്റ്റ് ചര്ച്ചയാവുന്നത്. ‘ഭാവി തലമുറയ്ക്ക് മാതൃകയാകേണ്ടിയിരുന്ന, ഒരു നാടിനും ആ കുടുംബങ്ങള്ക്കും മാതൃകയായും അഭിമാനമായും മാറേണ്ടിയിരുന്ന ചെറുപ്പക്കാരുടെ കുടുംബത്തോട് എത്രത്തോളം ആശ്വാസവാക്കുകള് പറഞ്ഞാലും മതിയാവില്ലെന്നറിയാം. എങ്കിലും, ആ കുടുംബത്തോടൊപ്പം നമുക്ക് ചേര്ന്നുനില്ക്കേണ്ടതുണ്ട്. അവരുടെ വേദനയില് പങ്കുകൊള്ളേണ്ടതുണ്ട്. അകാലത്തില് ജീവന് പൊലിഞ്ഞ റഹീസിന്റെയും വഹാസിന്റെയും സിയാദിന്റെയും ഫഹദിന്റെയും കുടുംബങ്ങള്ക്ക് നഷ്ടപരിഹാരത്തുക കാലവിളംബം ഏതുമില്ലാതെ നല്കാനുള്ള ഇടപെടല് നടത്തണമെന്ന് ചീഫ് സെക്രട്ടറിയോട് ആവശ്യപ്പെടുകയാണ്. എല്ലാ നടപടിക്രമങ്ങളും വേഗത്തില് പൂര്ത്തീകരിക്കണം. ഒപ്പം, പരിക്കേറ്റവര്ക്ക് എത്രയും വേഗത്തില് തന്നെ മികച്ച ചികിത്സ ഉറപ്പുവരുത്തണം.’-ഫേസ്ബുക്കില് കെ സി കുറിച്ചു.
