തൃശൂര്: അതിനൂതത ഹൃദ്രോഗ സാങ്കേതിക വിദ്യകളും ചികിത്സാ രീതികളും ചര്ച്ച ചെയ്യുന്ന കാര്ഡിയോളജിക്കല് സൊസൈറ്റി ഓഫ് ഇന്ത്യകേരള ചാപ്റ്ററിന്റെ സമ്മേളനം ‘സമ്മര് കോണ്ഫറന്സ് 2026’ ഹയാത്ത് റീജന്സിയില് ആരംഭിച്ചു. സി.എസ്.ഐ കേരള ചാപ്റ്റര് പ്രസിഡന്റ് ഡോ. പി.കെ. അശോകന് ഉദ്ഘാടനം ചെയ്തു.
നിര്മിത ബുദ്ധിയുടെ സഹായത്തോടെയുള്ള രോഗനിര്ണയം, അത്യാധുനിക ഇമേജിങ് സംവിധാനങ്ങള്, സുരക്ഷിതമായ കീ ഹോള് ചികിത്സകള്, അതിനൂതന ഹൃദയ ഉപകരണങ്ങള് എന്നിവ ഹൃദ്രോഗ ചികിത്സാരംഗത്ത് വലിയ മാറ്റങ്ങള് സൃഷ്ടിക്കുകയാണെന്ന് അദ്ദേഹം പറഞ്ഞു.
ഹൃദ്രോഗ സാധ്യതകള് തുടക്കത്തിലേ കണ്ടെത്താനും പ്രതിരോധ ചികിത്സ ശക്തിപ്പെടുത്താനും ആധുനിക സാങ്കേതിക വിദ്യകള് സഹായിക്കുന്നുണ്ട്. ഡ്രഗ് കോട്ടഡ് ബലൂണ് ആന്ജിയോപ്ലാസ്റ്റി, ഐവിയുഎസ്, ഒസിടി പോലുള്ള രക്തക്കുഴല് ഇമേജിങ് സാങ്കേതിക വിദ്യകള്, വയര് ഇല്ലാത്ത പേസ്മേക്കറുകള്, കാത്തിറ്റര് വഴിയുള്ള വാല്വ് മാറ്റിവെക്കല് ചികിത്സകള് എന്നിവ സങ്കീര്ണ ഹൃദ്രോഗങ്ങളുടെ ചികിത്സയെ കൂടുതല് കൃത്യതയുള്ളതാക്കി മാറ്റി. ഡോ. പി.കെ. അശോകന് പറഞ്ഞു.
സ്മാര്ട്ട് വാച്ചുകളും, മറ്റ് ധരിക്കാവുന്ന ഉപകരണങ്ങളും ഹൃദയമിടിപ്പിലെ അസാധാരണതകള് നേരത്തേ കണ്ടെത്താന് സഹായിക്കുന്നുണ്ട്. ഇതിലൂടെ സ്ട്രോക്ക് പോലുള്ള ഗുരുതര പ്രശ്നങ്ങള് കുറയ്ക്കാനാകുന്നുവെന്നും അദ്ദേഹം പറഞ്ഞു. ഓര്ഗനൈസിങ് ചെയര്മാന് ഡോ. കരുണദാസ് സി.പി. അധ്യക്ഷത വഹിച്ചു. അടുത്ത പത്ത് വര്ഷത്തിനിടെ ഹൃദ്രോഗ ചികിത്സാരംഗത്തെ മാറ്റിമറിക്കാന് സാധ്യതയുള്ള സാങ്കേതിക വിദ്യകളും ചികിത്സാരീതികളും സമ്മേളനത്തില് ചര്ച്ചയാകുമെന്ന് അദ്ദേഹം പറഞ്ഞു.
ഡോ. ഷൗജദ് മുഹമ്മദ്, ഓര്ഗനൈസിങ് ചെയര്മാന് ഡോ. കരുണദാസ് സി.പി, ഓര്ഗനൈസിങ്ങ് സെക്രട്ടറി ഡോ. ഷൗജാദ് മുഹമ്മദ്, സിഎസ്ഐ കേരള സെക്രട്ടറി ഡോ. ജോ ജോസഫ്, സയന്റിഫിക് കമ്മിറ്റി ചെയര്മാന് ചെയര്മാന് ഡോ. റോണി മാത്യു, ഡോ. പ്രവീണ്. എസ്. എന്നിവര് ഉദ്ഘാടന സമ്മേളനത്തില് സംസാരിച്ചു. ഹൃദ്രോഗ ചികിത്സാരംഗത്തെ അക്കാദമിക് സംഭാവനകള്ക്ക് പത്ത് ഹൃദ്രോഗ വിദഗ്ധരെ സമ്മേളനത്തില് ആദരിച്ചു.
