ബെംഗളൂരു: ലക്ഷ്യം വ്യക്തമാവുകയും സേവനമനോഭാവത്തോടെ പ്രവര്ത്തിക്കുകയും ചെയ്യുമ്പോള്, എല്ലാ പരിശ്രമങ്ങളും മനോഹരമായ ഫലങ്ങള് നല്കുമെന്ന് പ്രധാനമന്ത്രി നരേന്ദ്ര മോദി. ബെംഗളൂരുവില് നടന്ന ആര്ട്ട് ഓഫ് ലിവിങ്ങിന്റെ 45-ാം വാര്ഷിക ആഘോഷങ്ങളില് പങ്കെടുത്ത് സംസാരിക്കുകയായിരുന്നു അദ്ദേഹം.
ചടങ്ങിന്റെ ഐശ്വര്യത്തെക്കുറിച്ച് പ്രതിപാദിച്ച പ്രധാനമന്ത്രി, കുട്ടികളുടെ വേദമന്ത്രോച്ചാരണങ്ങളോടെയുള്ള സ്വീകരണം, ഗണപതി ദര്ശനം, ശ്രീശ്രീ രവിശങ്കറിന്റെ 70-ാം ജന്മവാര്ഷികം, ആര്ട്ട് ഓഫ് ലിവിങ്ങിന്റെ 45-ാം വാര്ഷികാഘോഷം എന്നിവയാല് സമ്പന്നമാണെന്ന് വിവരിച്ചു. സന്ദര്ശനവേളയില് ധ്യാന ക്ഷേത്രത്തിന്റെ ഉദ്ഘാടനവും നിര്വഹിച്ചു.
സോഫ്ട്വെയറുകള്ക്കും സേവനങ്ങള്ക്കും മാത്രമല്ല, ഭാരതത്തിന്റെ സാംസ്കാരിക സ്വത്വത്തെയും ആത്മീയ അവബോധത്തെയും ഉയര്ത്തുന്നതിലും ബെംഗളൂരു ആഗോളതലത്തില് അംഗീകരിക്കപ്പെട്ടിട്ടുണ്ടെന്ന് അദ്ദേഹം ചൂണ്ടിക്കാട്ടി.
ആത്മീയതയ്ക്കും ആത്മീയ അവബോധത്തിനും
നഗരം പുതിയ ഉയരങ്ങള് നല്കി. ഭാരതീയ മൂല്യങ്ങളുടെ അവിഭാജ്യഘടകമായ യോഗ, ധ്യാനം, പ്രാണായാമം എന്നിവയുടെ ആഴത്തിലുള്ള വേരുകളെക്കുറിച്ച് സംസാരിക്കവേ, ഭാരതത്തിന്റെ ആത്മീയ പൈതൃകത്തിന്റെ ആഗോള സ്വാധീനത്തെക്കുറിച്ചും നിരവധി സ്ഥാപനങ്ങളെ പ്രചോദിപ്പിക്കുന്നതില് ആര്ട്ട് ഓഫ് ലിവിങ്ങിന്റെ പങ്കിനെക്കുറിച്ചും അദ്ദേഹം പരാമര്ശിച്ചു. സേവനം എന്നത് ഭാരതീയ സമൂഹത്തിന്റെ സഹജമായ സ്വഭാവമാണ്. ഭാരതത്തിലെ പല ആത്മീയ പ്രസ്ഥാനങ്ങളും ആത്യന്തികമായി മാനുഷിക സേവനത്തിലൂടെയാണ് പ്രകടമാകുന്നതെന്ന് സൂചിപ്പിച്ച പ്രധാനമന്ത്രി, ആര്ട്ട് ഓഫ് ലിവിങ്ങിന്റെ ഓരോ ശ്രമത്തിലും ഇതേ ആവേശമാണ് പ്രതിഫലിക്കുന്നതെന്നും പറഞ്ഞു. ആര്ട്ട് ഓഫ് ലിവിങ്ങിന്റെ മുന്നോട്ടുള്ള യാത്രയുമായി ബന്ധപ്പെട്ട ഓരോ വളണ്ടിയര്മാര്ക്കും ആശംസകള് നേര്ന്ന അദ്ദേഹം, അവരുടെ സമര്പ്പണത്തെയും സേവനമനോഭാവത്തെയും പ്രശംസിച്ചു.
പുതിയതായി ഉദ്ഘാടനം ചെയ്ത ധ്യാനമന്ദിരം ആയിരക്കണക്കിന് ആളുകള്ക്ക് സമാധാനത്തിന്റെയും സാന്ത്വനത്തിന്റെയും സങ്കേതമായി മാറും. സുസ്ഥിര കൃഷിയെ ആര്ട്ട് ഓഫ് ലിവിങ്ങിന്റെ തന്നെ ഒരു ആവിഷ്കാരമായി പ്രധാനമന്ത്രി വിശേഷിപ്പിച്ചു. ഭൂമിമാതാവിനെ രാസവസ്തുക്കളില് നിന്ന് സംരക്ഷിക്കുന്നത് ആത്മീയ പരിശീലനവും പരിസ്ഥിതി പരിപാലനവുമാണ്. ഏക് പെഡ് മാ കേ നാം പോലുള്ള പ്രചാരണ പരിപാടിയുടെ ആവശ്യകതയും അദ്ദേഹം വ്യക്തമാക്കി. പരിസ്ഥിതി സംരക്ഷണമെന്നതും ആര്ട്ട് ഓഫ് ലിവിങ് ആണെന്ന് പ്രധാനമന്ത്രി പറഞ്ഞു.
