ന്യൂദല്ഹി: ഭാരതത്തിന്റെ തദ്ദേശ നിര്മിത പ്രതിരോധ സംവിധാനം ടാക്റ്റിക്കല് അഡ്വാന്സ്ഡ് റേഞ്ച് ഓഗ്മെന്റേഷന് (താര) ആദ്യ പറക്കല് പരീക്ഷണം വിജയകരം. പ്രതിരോധ ഗവേഷണ വികസന സംഘടനയും (ഡിആര്ഡിഒ) വ്യോമസേനയും സംയുക്തമായാണ് പരീക്ഷണം നടത്തിയത്. ഒഡീഷ തീരത്ത് ജാഗ്വാര് സ്രടൈക്ക് എയര്ക്രാഫ്റ്റ് വിക്ഷേപണ പ്ലാറ്റ്ഫോമായി ഉപയോഗിച്ചായിരുന്നു വിക്ഷേപണം.
മോഡുലാര് റേഞ്ച് എക്സ്റ്റന്ഷന് കിറ്റായ താര, ഗൈഡഡ് ചെയ്യാത്ത വാര്ഹെഡുകളെ കൃത്യതയുള്ള ഗൈഡഡ് ആയുധങ്ങളാക്കി മാറ്റുന്ന ഭാരതത്തിലെ ആദ്യത്തെ തദ്ദേശീയ ഗ്ലൈഡ് ആയുധ സംവിധാനമാണ്. ഹൈദരാബാദ് ആസ്ഥാനമായുള്ള റിസര്ച്ച് സെന്റര് ഇമാറാത്ത് (ആര്സിഐ) മറ്റ് ഡിആര്ഡിഒ ലബോറട്ടറികളുമായി ചേര്ന്നാണ് ഈ ആയുധം രൂപകല്പ്പന ചെയ്തിരിക്കുന്നത്. താര ഉപയോഗിച്ച് ശത്രുക്കളുടെ വ്യോമപ്രതിരോധ സംവിധാനങ്ങളുടെ പരിധിയില് പ്രവേശിക്കാതെ തന്നെ അവരെ ആക്രമിക്കാന് കഴിയും. ജാഗ്വാര്, മിറേജ്-2000, സുഖോയ്, തദ്ദേശീയമായി നിര്മിച്ച തേജസ് വിമാനങ്ങള് എന്നിവയുള്പ്പെടെ ഒന്നിലധികം യുദ്ധവിമാന പ്ലാറ്റ്ഫോമുകളില് ഈ ഗ്ലൈഡ്-കിറ്റ് സംയോജിപ്പിച്ചിരിക്കുന്നു.
ഭാരതത്തിന്റെ തദ്ദേശീയ പ്രതിരോധ ശേഷി മെച്ചപ്പെടുത്തുന്നതില് സുപ്രധാന പുരോഗതിയാണിതെന്ന് വിശേഷിപ്പിച്ച പ്രതിരോധമന്ത്രി രാജ്നാഥ് സിങ്, ആദ്യ പറക്കല് പരീക്ഷണത്തിന് ഡിആര്ഡിഒ, വ്യോമസേന, പങ്കാളികളായിട്ടുള്ള മറ്റ് ഏജന്സികളെയും അഭിനന്ദിച്ചു.
വിജയകരമായ ഫ്ലൈറ്റ് ട്രയലില് പങ്കെടുത്ത ടീമുകളെ പ്രതിരോധ ഗവേഷണ വികസന വകുപ്പ് സെക്രട്ടറിയും ഡിആര്ഡിഒ ചെയര്മാനുമായ ഡോ. സമീര് വി. കാമത്തും അഭിനന്ദിച്ചു.
