ലണ്ടന്: ഫോട്ടോ ഫിനിഷിലേക്ക് നീങ്ങുന്ന ഇംഗ്ലീഷ് പ്രീമിയര് ലീഗ് ഫുട്ബോളില് ആഴ്സണല് ഇന്ന് കളത്തിലിറങ്ങും. വെസ്റ്റ് ഹാമിനെതിരെ അവരുടെ തട്ടകത്തില് രാത്രി ഒമ്പതിനാണ് മത്സരം. ഈ മത്സരത്തില് ജയിച്ചാല് ആഴ്സണലിന് ലീഗ് കിരീടത്തിലേക്ക് ഒരു ചുവട് കൂടി അടുത്തുകൊണ്ട് കൂറേക്കൂടി സുരക്ഷിതമാകാന് സാധിക്കും. മറിച്ച് സമനില വഴങ്ങുകയോ തോല്ക്കുകയോ ചെയ്താല് കൂടുതല് കലുഷിതമാകും.
ഇതുവരെ 35 മത്സരങ്ങള് പൂര്ത്തിയാകുമ്പോള് ആഴ്സണലിന് 76 പോയിന്റുണ്ട്. 34 മത്സരങ്ങള് പൂര്ത്തിയാക്കിയ മാഞ്ചസ്റ്റര് സിറ്റിയെക്കാള് അഞ്ച് പോയിന്റ് മുന്നില്. വര്ഷങ്ങളുടെ ഇടവേളയ്ക്ക് ശേഷമാണ് ആഴ്സണല് ലീഗ് ടൈറ്റില് നേടാവുന്ന തരത്തിലേക്ക് ഉയര്ന്നുകൊണ്ടിരിക്കുന്നത്. ഇന്നത്തെ മത്സരം കൂടി കഴിഞ്ഞാല് രണ്ട് കളികളേ ആഴ്സണലിന് അവശേഷിക്കുന്നുള്ളൂ. 18ന് ബണ്ലിയോടും 24ന് ക്രിസ്റ്റല് പാലസിനോടുമാണ് ആ മത്സരങ്ങള്.
ലീഗില് ഇന്നലെ നടന്ന ഗ്ലാമര് പോരാട്ടത്തില് ലിവര്പൂള് എഫ്സിയും ചെല്സിയും ഓരോ ഗോള് നേടി സമനില പാലിച്ചു.
