കൊല്‍ക്കത്ത: പശ്ചിമ ബംഗാളില്‍ സുവേന്ദു അധികാരി മുഖ്യമന്ത്രിയാകും. നിയമസഭാ കക്ഷി യോഗത്തിലാണ് സുവേന്ദുവിനെ നേതാവായി തീരുമാനിച്ചത്.ശനിയാഴ്ച രാവിലെ മുഖ്യമന്ത്രിയായി അദ്ദേഹം സത്യപ്രതിജ്ഞ ചെയ്യും.
ബ്രിഗേഡ് പരേഡ് ഗ്രൗണ്ടിലാണ് സത്യപ്രതിജ്ഞ ചടങ്ങ്. സത്യപ്രതിജ്ഞാച്ചടങ്ങില്‍ പ്രധാനമന്ത്രി നരേന്ദ്രമോദി, ആഭ്യന്തരമന്ത്രി അമിത് ഷാ, എന്‍ഡിഎ മുഖ്യമന്ത്രിമാര്‍ തുടങ്ങിയവര്‍ പങ്കെടുക്കും. സത്യപ്രതിജ്ഞയ്‌ക്കുശേഷം പുതിയ മുഖ്യമന്ത്രി പഴയ റൈറ്റേഴ്‌സ് ബില്‍ഡിംഗിലെ ഓഫീസിലാണ് ചുമതലയേല്‍ക്കുക. മമതാ ബാനര്‍ജി ഈ ഓഫീസ് ഒഴിവാക്കിയിരുന്നു.
സംസ്ഥാനത്തെ പ്രതിപക്ഷ നേതാവായിരുന്ന സുവേന്ദു ഭവാനിപുര്‍, നന്ദിഗ്രാം എന്നീ മണ്ഡലങ്ങളില്‍ നിന്ന് വിജയിച്ചാണ് നിയമസഭയിലെത്തിയത്. ഭവാനിപുരില്‍ മുഖ്യമന്ത്രി മമതാ ബാനര്‍ജിയെ ആണ് പരാജയപ്പെടുത്തിയത്.
തൃണമൂല്‍ കോണ്‍ഗ്രസ് മുന്‍ നേതാവ് കൂടിയായിരുന്നു സുവേന്ദു അധികാരി.കഴിഞ്ഞ അഞ്ച് വര്‍ഷം സര്‍ക്കാരിനെതിരെ പ്രതിപക്ഷത്തിന്റെ പോരാട്ടങ്ങള്‍ക്ക് നേതൃത്വം നല്‍കിയത്.
55കാരനായ സുവേന്ദു അവിവാഹിതനാണ്. പിതാവ് സിസിര്‍ അധികാരി കാന്തിയില്‍ നിന്നുള്ള ലോക്സഭാംഗവും ഒന്നാം യുപിഎ സര്‍ക്കാരില്‍ മന്ത്രിയുമായിരുന്നു.
