ഭാരതം സന്ദര്ശിക്കുന്ന വിയറ്റ്നാം പ്രസിഡന്റ് തോ ലാം ന്യൂദല്ഹിയില് പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തിയപ്പോള്
ന്യൂദല്ഹി: വ്യാപാര വാണിജ്യ ബന്ധം ശക്തമാക്കാനും വിയറ്റ്നാമിന്റെ ഡിജിറ്റൈസേഷന് സഹായം ലഭ്യമാക്കാനും ഭാരതവും വിയറ്റ്നാമും തമ്മില് കരാറായി. പ്രധാനമന്ത്രി നരേന്ദ്ര മോദിയും വിയറ്റ്നാം പ്രസിഡന്റ് തോ ലാമും തമ്മില് നടന്ന ചര്ച്ചയിലാണ് കരാര് ഒപ്പിട്ടത്.
പുതിയ സാങ്കേതികവിദ്യകള്ക്കൊപ്പം അപൂര്വ്വ ഭൗമ ധാതുക്കള് ഉള്പ്പെടുന്ന മേഖലകളില് ഉഭയകക്ഷി സഹകരണം വിപുലീകരിക്കാനുള്ള കരാറാണ് ഒന്ന്. സാംസ്കാരിക മന്ത്രാലയവും വിയറ്റ്നാമിലെ സാംസ്കാരിക, കായിക, ടൂറിസം മന്ത്രാലയവും തമ്മിലുള്ള സാംസ്കാരിക വിനിമയ പരിപാടിക്കുള്ളതാണ് മറ്റൊന്ന്. ഡിജിറ്റല് പേയ്മെന്റ് മേഖലയില് സഹകരിക്കാന് റിസര്വ് ബാങ്ക് ഓഫ് ഇന്ത്യയും സ്റ്റേറ്റ് ബാങ്ക് ഓഫ് വിയറ്റ്നാമും തമ്മിലും ധാരണയായി.
മെഡിക്കല് ഉത്പന്ന മേഖലയിലും സഹകരിക്കും. ഫാര്മസ്യൂട്ടിക്കല്സ്, മെഡിക്കല് ഉത്പന്നങ്ങള്, മെഡിക്കല് ഉപകരണങ്ങള്, സൗന്ദര്യവര്ദ്ധക വസ്തുക്കള് എന്നിവയുള്പ്പെടെയുള്ള കാര്യങ്ങളിലാണ് സഹകരണം.
ഡിജിറ്റല് സാങ്കേതിക വിദ്യാരംഗത്തെ സഹകരണത്തിനായി ഇലക്ട്രോണിക്സ് ആന്ഡ് ഇന്ഫര്മേഷന് ടെക്നോളജി മന്ത്രാലയവും വിയറ്റ്നാമിലെ ശാസ്ത്ര സാങ്കേതിക മന്ത്രാലയവും തമ്മിലും കരാറായി. ഇതോടെ ഡിജിറ്റല് സാങ്കേതികവിദ്യ, ഐടി മേഖലകള് എന്നിവയിലെ സഹകരണം ശക്തമാകും. വിനോദസഞ്ചാര മേഖലയിലും സഹകരിക്കും. 2030ഓടെ 25 ബില്യണ് യുഎസ് ഡോളറിന്റെ വ്യാപാരം കൈവരിക്കുകയാണ് ലക്ഷ്യം. ഭാരതത്തിലെ മുന്തിരി വിയറ്റ്നാമിലേക്കും വിയറ്റ്നാമീസ് ദുരിയാന് ഭാരതത്തിലേക്കും കയറ്റുമതി ചെയ്യും.
