കോട്ടയം: കോണ്ഗ്രസില് മുഖ്യമന്ത്രി ചര്ച്ചകള് സജീവമായി മുന്നോട്ട് പോകവെ കെ സി വേണുഗോപാലിനെ വിമര്ശിച്ച് ഓര്ത്തഡോക്സ് സഭ.എംപിമാര് മത്സരിക്കേണ്ട എന്നു തീരുമാനിച്ച ശേഷം മുഖ്യമന്ത്രി സ്ഥാനത്തേക്ക് ഒരു എംപിയുടെ പേര് ഉയര്ന്നു വരുന്നത് വിരോധാഭാസമാണെന്ന് ഓര്ത്തഡോക്സ് സഭ ഭദ്രാസന മെത്രാപൊലീത്ത ഡോ. യൂഹാനോന് മാര് ദിയസ്കോറസ് പറഞ്ഞു.
എംപിമാര് മുഖ്യമന്ത്രി ആകുന്നതില് നിയമതടസമില്ല.ആലിപ്പഴം പഴുത്തപ്പോള് കാക്കയ്ക്ക് വായ്പ്പുണ്ണ് എന്ന സ്ഥിതിയാണ് ഇപ്പോഴെന്നും അദ്ദേഹം വിമര്ശിച്ചു.
കോണ്ഗ്രസ് പാര്ട്ടി ഒരു നല്ല തീരുമാനം എടുക്കുമായിരിക്കും. എന്നാല് ജനം ഇതിനെയൊക്കെ എങ്ങനെ കാണുമെന്ന് കുറച്ചു കഴിയുമ്പോഴേ നമുക്ക് മനസിലാക്കാന് കഴിയുകയുള്ളൂ.മുഖ്യമന്ത്രി സ്ഥാനത്തിന് എന്തോ ചില ബഹളങ്ങള് നടക്കുന്ന കാഴ്ചകള് കാണുന്നുണ്ട്. ഞങ്ങള് ജയിച്ചു എന്നതുകൊണ്ട് ഇങ്ങനെ ഓരോ വിഷയങ്ങളുണ്ടാക്കി ജനത്തെ ബുദ്ധിമുട്ടിക്കാന് പാടില്ല എന്നത് ജയിച്ചവരും മനസിലാക്കണം എന്നത് യാഥാര്ത്ഥ്യമാണെന്ന് ഡോ. യൂഹാനോന് മാര് ദിയസ്കോറസ് പറഞ്ഞു.
