കോഴിക്കോട്: 102 സീറ്റ് ലഭിച്ച് മുഖ്യമന്ത്രിയും മന്ത്രിസഭയും സത്യപ്രതിജ്ഞ ചെയ്യുന്നതിന് മുമ്പുതന്നെ യുഡിഎഫിന്റെ തനി നിറം പുറത്താകുന്നു. തെരഞ്ഞെടുപ്പ് വിജയാഹ്ലാദത്തിന്റെ മറവില് താലിബാന് ശൈലിയെ അനുസ്മരിപ്പിച്ചാണ് സംസ്ഥാനത്തിന്റെ പല ഭാഗങ്ങളിലും ഞെട്ടിക്കുന്ന സംഭവങ്ങള് അരങ്ങേറിയത്.
കാസര്കോട് ജില്ലയിലെ പൈവെളിഗ, ഉപ്പള, പെരിയങ്കടി, അരിക്കാടി എന്നിവിടങ്ങളില് എന്ഡിഎ സ്ഥാനാര്ത്ഥി കെ. സുരേന്ദ്രന്റെ തെരഞ്ഞെടുപ്പ് പ്രചരണത്തിനായി സ്ഥാപിച്ച ഫ്ളക്സ് ബോര്ഡുകള് ബോംബെറിഞ്ഞ് തകര്ത്താണ് യുഡിഎഫ് ആഹ്ലാദപ്രകടനം നടത്തിയത്. നാടന് ബോംബുകള് ഉപയോഗിച്ച് ബോര്ഡുകള് തകര്ക്കുന്ന ദൃശ്യങ്ങള് സാമൂഹ്യ മാധ്യമങ്ങളില് വ്യാപകമായി പ്രചരിപ്പിക്കുകയും ചെയ്തു.
ഇതിനേക്കാള് ഭീകരമായാണ് മലപ്പുറത്ത് നടന്ന ‘ആഹ്ലാദ’ പ്രകടനം. തവനൂരില് പ്രകടനത്തില് അറുത്ത ആടിന്റെ തലയുമായാണ് ആഹ്ലാദം പ്രകടിപ്പിച്ചത്. തവനൂര് മണ്ഡലത്തിലെ യുഡിഎഫ് സ്ഥാനാര്ത്ഥിയുടെ വിജയത്തെ തുടര്ന്ന് തൃപ്രങ്ങോട് പഞ്ചായത്തില് നടന്ന വിജയാഹ്ലാദത്തിലാണ് ക്രൂരത അരങ്ങേറിയത്. തിങ്കള് പകല് ഒന്നോടെയാണ് തൃപ്രങ്ങോട് പെരുന്തല്ലൂര് അങ്ങാടിയില് ചോര ചിന്തുന്ന ആടിന്തല വടിയില് കെട്ടി പൊതുമധ്യത്തില് പ്രദര്ശിപ്പിച്ചത്. യൂത്ത് ലീഗ് പെരുന്നല്ലൂര് വാര്ഡ് സെക്രട്ടറിയും തൃപ്രങ്ങോട് പഞ്ചായത്ത് ഭാരവാഹിയുമായ കുരിക്കള്പടി മച്ചിങ്ങല് റാഫി, വാല്പറമ്പില് ഷുഹൈബ് എന്നിവരുടെ നേതൃത്വത്തിലായിരുന്നു മനുഷ്യമനസാക്ഷിയെ വേദനിപ്പിക്കുന്ന കൃത്യം അരങ്ങേറിയത്. ഇതിന്റെ വീഡിയോ സമൂഹമാധ്യമത്തിലൂടെ പങ്കുവെക്കുകയും ചെയ്തു. രണ്ട് സംഭവങ്ങളെക്കുറിച്ചും കേന്ദ്രരഹസ്യാന്വേഷണ വിഭാഗം അന്വേഷണം ആരംഭിച്ചിട്ടുണ്ട്.
