മുംബൈ: അഞ്ചുവട്ടം ഐപിഎല് കിരീടമുയര്ത്തിയ മുംബൈ ഇന്ത്യന്സ് പ്ലേ ഓഫീലെത്തുമോ എന്നതാണ് ഇപ്പോഴുയരുന്ന ചോദ്യം. കഴിഞ്ഞ ദിവസം ലഖ്നൗ സൂപ്പര് ജയന്റ്സിനെതിരെ നടന്ന മത്സരത്തില് മിന്നും ജയവുമായി മുംബൈ ഇന്ത്യന്സ് പ്ലേ ഓഫ് സാധ്യത സജീവമാക്കിയിരിക്കുകയാണ്. ഇന്നലെ എട്ട് പന്തുകള് ബാക്കിനില്ക്കെ ആറ് വിക്കറ്റിന്റെ തകര്പ്പന് ജയമാണ് മുംബൈ നേടിയത്. നിലവില് 10 കളികളില് നിന്ന് മൂന്ന് ജയങ്ങളും ഏഴ് തോല്വികളുമടക്കം വെറും ആറ് പോയിന്റുകള് മാത്രമാണ് മുംബൈക്കുള്ളത്.
നെറ്റ് റണ് റേറ്റ് -0.649. പോയിന്റ് ടേബിളില് മുംബൈ ഒമ്പതാം സ്ഥാനത്താണ്. സംഗതി ഇങ്ങനെയൊക്കെയാണെങ്കിലും മുംബൈക്ക് പ്ലേ ഓഫിലെത്താന് നേരിയ സാധ്യത നിലനില്ക്കുന്നുണ്ട്. പ്ലേ ഓഫിലെത്താന് ചുരുങ്ങിയത് 14 പോയിന്റ് എങ്കിലും വേണം. എന്നാല്, 16 പോയിന്റ് നേടിയാല് പ്ലേ ഓഫ് ഉറപ്പിക്കാം.
മുംബൈയ്ക്ക് ഇനി നാല് മത്സരങ്ങളാണ് ശേഷിക്കുന്നത്. ഇതില് നാലും ജയിച്ചാല് മാത്രമാണ് പോയിന്റ് പട്ടികയില് 14 പോയിന്റിലെത്തുകയുള്ളൂ. 16 പോയിന്റ് എന്നത് അപ്രാപ്യമാണ്. മികച്ച റണ് റേറ്റുള്ള മുംബൈ ഇനിയുള്ള എല്ലാ മത്സരങ്ങളും മികച്ച മാര്ജിനില് ജയിക്കുക കൂടി ചെയ്താല് ഒരു പക്ഷേ പ്ലേ ഓഫിലെത്താനാകും. മറ്റ് ടീമുകളെ ഫലത്തെ ആശ്രയിച്ചാകും മുംബൈയുടെ പ്ലേ ഓഫ് സാധ്യതകള്. മറ്റ് ടീമുകളില് പോയിന്റ് നിലയില് മുംബൈക്ക് തൊട്ടുമുന്നിലുള്ള ടീമുകളുടെ മത്സര ഫലങ്ങളും നിര്ണായകമാണ്.
പരിക്ക് മൂലം കഴിഞ്ഞ ഒരുപാട് മത്സരങ്ങള് നഷ്ടമായ രോഹിത് ശര്മയുടെ വെടിക്കെട്ട് പ്രകടനമാണ് ലഖ്നൗവിനെതിരേ മുംബൈ ഇന്ത്യന്സിന് തുണയായത്.
ആദ്യം ബാറ്റ് ചെയ്ത ലഖ്നൗ 20 ഓവറില് അഞ്ച് വിക്കറ്റ് നഷ്ടത്തില് 228 റണ്സെടുത്തു. മറുപടി ബാറ്റിങ്ങില് 18.4 ഓവറില് അഞ്ച് വിക്കറ്റ് നഷ്ടത്തില് മുംബൈ ലക്ഷ്യം മറികടന്നു. റിയാന് റിക്കല്ട്ടണും രോഹിത് ശര്മയും ചേര്ന്നുള്ള ഓപ്പണിങ് കൂട്ടുകെട്ടാണ് മുംബൈക്ക് അനായാസ ജയമൊരുക്കിയത്. 32 പന്തില് ആറ് ബൗണ്ടറിയും എട്ട് പടുകൂറ്റന് സിക്സുമടക്കം റിക്കില്ട്ടണ് 83 റണ്സ് നേടിയപ്പോള് രോഹിത് 44 പന്തില് ആറ് ബൗണ്ടറിയും ഏഴ് സിക്സുമടക്കം 84 റണ്സും നേടി. 12 പന്തില് 23 റണ്സ് നേടിയ നമന് ധിറും നാല് പന്തില് 10 റണ്സുമായി വില് ജാക്സും പുറത്താകാതെ നിന്നു.
