കൊച്ചി: ഭാരതത്തില് നടക്കുന്ന നവോത്ഥാനത്തിന്റെ, ജാഗരണത്തിന്റെ ഒരു പങ്കാണ് ജന്മഭൂമി നിര്വഹിക്കുന്നതെന്ന് ആര്എസ്എസ് ദക്ഷിണ ക്ഷേത്ര പ്രചാരക് പി.എന്. ഹരികൃഷ്ണകുമാര്. കലൂര് റിന്യൂവല് സെന്ററില് നടന്ന ജന്മഭൂമി പ്രവര്ത്തകസംഗമം ഉദ്ഘാടനം ചെയ്യുകയായിരുന്നു അദ്ദേഹം.
ഭാരതത്തെ സമുദ്ധരിക്കാനായി നടക്കുന്ന മഹായജ്ഞത്തില് കേരളത്തിലെ ജനങ്ങളുടെ ചിന്തയെയും ബുദ്ധിയെയും സ്വാധീനിക്കാന് വേണ്ടിയുള്ള പ്രവര്ത്തനമാണ് ജന്മഭൂമി നിര്വഹിക്കുന്നത്. വലിയൊരു ആശയത്തിന് വേണ്ടിയുള്ള വലിയ മുന്നേറ്റത്തിനായി ഒരു കുടുംബം എന്ന നിലയിലാണ് അത് മുന്നോട്ട് പോകുന്നത്. പത്രം മുന്നോട്ട് വയ്ക്കുന്ന ദേശീയ ആശയത്തിന് സ്വീകാര്യത വര്ദ്ധിച്ചുവരികയാണ്. സമര്പ്പിതമായ കര്മ്മത്തിലൂടെ നല്ലൊരു ടീമായിട്ടാണ് മുന്നോട്ടുപോകുന്നതെന്നും അദ്ദേഹം പറഞ്ഞു.
ചടങ്ങില് ജന്മഭൂമി എംഡി എം. രാധാകൃഷ്ണന് അധ്യക്ഷത വഹിച്ചു. എഡിറ്റര് കെ.എന്.ആര്. നമ്പൂതിരി, കെ. കുഞ്ഞിക്കണ്ണന് എന്നിവര് സംസാരിച്ചു. ജന്മഭൂമിയില് നിന്ന് വിരമിച്ചവരെ ചടങ്ങില് ആദരിച്ചു. ജനറല് മാനേജര് കെ.ബി. ശ്രീകുമാര് സ്വാഗതവും ഡെപ്യൂട്ടി ജനറല് മാനേജര് കെ.എം. ശ്രീദാസ് നന്ദിയും പറഞ്ഞു.
