ന്യൂദല്ഹി: ഈ വര്ഷം ജനുവരി മുതല് മാര്ച്ച് വരെ 9400 വാട്സാപ്പ് അക്കൗണ്ടുകള് പൂട്ടിയതായി മെറ്റ അറിയിച്ചിട്ടുണ്ടെന്ന് കേന്ദ്രം സുപ്രീംകോടതിയില് ബോധിപ്പിച്ചു. സര്ക്കാര് അന്വേഷണ ഏജന്സികളുടെ സംയോജിത അന്വേഷണങ്ങളുടെ ഫലമായാണിത്, അറ്റോര്ണി ജനറല് ആര്. വെങ്കട്ടരമണി പറഞ്ഞു.
പോലീസ് അടക്കമുള്ള ഏജന്സികളാണെന്ന പേരിലാണ് ഇത്തരം തട്ടിപ്പുകാര് പ്രവര്ത്തിക്കുന്നത്. ഇരകളില് നിന്ന് വലിയ തുകകളാണ് തട്ടിയെടുക്കുന്നത്. ഇത്തരം തട്ടിപ്പുകാര് എങ്ങനെയാണ് പ്രവര്ത്തിക്കുന്നതെന്ന് വാട്ട്സാപ്പ് അധികൃതരും കണ്ടെത്തിയിട്ടുണ്ട്. കംമ്പോഡിയ പോലുള്ള ചില തെക്കനേഷ്യന് രാജ്യങ്ങളിലാണ് ഭാരതീയരെ ലക്ഷ്യമിട്ടുള്ള ഇത്തരം തട്ടിപ്പുകേന്ദ്രങ്ങള് പ്രവര്ത്തിക്കുന്നത്.
ദല്ഹി പോലീസ്, മുബൈ ഹെഡ് ക്വാര്ട്ടേഴ്സ്, സിബിഐ എടിഎസ് ഡിപ്പാര്ട്ടുമെന്റ് എന്നിങ്ങനെ ഔദ്യോഗികമെന്ന് തോന്നിപ്പിക്കുന്ന ലോഗോകളും ചിത്രങ്ങളും ചിഹ്നങ്ങളുമാണ് ഇവര് ഉപയോഗിക്കുന്നത്. ഇവ കണ്ടെത്താനുള്ള സംവിധാനങ്ങള് വാട്ട്സാപ്പ് ഒരുക്കിയിട്ടുണ്ട്. തങ്ങള് സൈബര് ക്രൈം കോര്ഡിനേഷന് സെന്റര്, ടെലിക്കമ്മ്യൂണിക്കേഷന്സ്, ഇലക്ട്രോണിക് മന്ത്രാലയങ്ങള് എന്നിവയുമായി യോജിച്ചാണ് പ്രവര്ത്തിക്കുന്നതെന്നും മെറ്റ അറിയിച്ചു.
