പത്തനംതിട്ട: കേന്ദ്ര സര്ക്കാരിന്റെ പുരപ്പുറ സോളാര് വൈദ്യുത പദ്ധതിയായ ‘പിഎം സൂര്യഘര്’ ഇടതു സര്ക്കാര് അട്ടിമറിച്ചതാണ് കേരളം ഇപ്പോള് അനുഭവിക്കുന്ന വൈദ്യുതി ക്ഷാമത്തിന് കാരണമെന്ന് വിദഗ്ധര്.
സൂര്യഘര് പദ്ധതിയില് ഉത്പാദിപ്പിക്കുന്ന സൗരോര്ജ വൈദ്യുതി ഏറ്റെടുത്തു വിതരണം ചെയ്യാന് കെഎസ്ഇബി ട്രാന്സ്ഫോര്മറുകള്ക്ക് ശേഷിയില്ലാത്തതാണ് പ്രധാന കാരണം. കെഎസ്ഇബിയുടെ നിലവിലുള്ള പല ട്രാന്സ്ഫോര്മറുകളുടേയും വൈദ്യുതാഗിരണ ശേഷി (ഹോസ്റ്റിങ് കപ്പാസിറ്റി) 90 ശതമാനത്തിനു മുകളിലാണ്. അതിനാല് പുരപ്പുറത്തുനിന്നും ലഭിക്കുന്ന അധിക വൈദ്യുതി സ്വീകരിക്കാന് ഈ ട്രാന്സ്ഫോര്മറുകള്ക്കു ശേഷിയില്ല. ഇതുമൂലം പുതിയ പുരപ്പുറ സോളാര് അപേക്ഷകര്ക്ക് സാങ്കേതികാനുമതി ലഭിക്കുന്നില്ല.
ട്രാന്സ്ഫോര്മറുകളുടെ ശേഷി കുറവായതിനാല് പുതിയ സോളാര് കണക്ഷനുകള്ക്ക് ഹൈബ്രിഡ് ഇന്വെര്ട്ടറുകളും ബാറ്ററി സ്റ്റോറേജ് സംവിധാനവും നിര്ബന്ധമാക്കാനാണ് റെഗുലേറ്ററി കമ്മിഷന്റെ പുതിയ നിര്ദ്ദേശം. എന്നാല് ഇത് സാധാരണക്കാരായ അപേക്ഷകര്ക്ക് അധിക സാമ്പത്തിക ബാധ്യത വരുത്തുന്നതാണ്. 10 കിലോവാട്ട് വരെയുള്ള പുരപ്പുറ പദ്ധതികള്ക്ക് ട്രാന്സ്ഫോര്മറിന്റെ ശേഷി നോക്കാതെ അനുമതി നല്കണമെന്നാണ് കേന്ദ്ര നിര്ദ്ദേശം. കൂടാതെ അടിസ്ഥാന സൗകര്യങ്ങള് വര്ദ്ധിപ്പിക്കേണ്ടത് വൈദ്യുതി ബോര്ഡിന്റെ ഉത്തരവാദിത്തമാണെന്നും കേന്ദ്രം വ്യക്തമാക്കുന്നു.
കൂടുതല് ശേഷിയുള്ള ട്രാന്സ്ഫോര്കള് സ്ഥാപിക്കണമെന്ന കേന്ദ്ര നിര്ദ്ദേശം പാലിക്കാന് സംസ്ഥാന സര്ക്കാര് തയാറായില്ലെന്നതാണ് ഗുരുതര പ്രശ്നം. പുരപ്പുറ വൈദ്യുത പദ്ധതിയുടെ നേട്ടം കേന്ദ്ര സര്ക്കാരിന് ലഭിക്കുമെന്നതിനാലായിരുന്നു ഈ അലംഭാവം.
സംസ്ഥാന സര്ക്കാരിന്റെ ഈ നിലപാട് സോളാര് ഊര്ജം പ്രോത്സാഹിപ്പിക്കാനുള്ള ദേശീയ നയത്തിന്റെ കടയ്ക്കല് കത്തിവെക്കുന്നതാണ്. കേരളത്തില് വൈദ്യുത വിതരണശൃംഖല കൂടുതല് ശക്തമാക്കാതെ പുരപ്പുറ സോളാര് വൈദ്യുതി ഉല്പാദനത്തില് മുന്നേറ്റം സാധ്യമാകില്ലെന്നാണ് നിലവിലെ സാഹചര്യം വ്യക്തമാക്കുന്നത്.
കൂടുതല് തുക ചെലവാക്കാന് ശേഷിയുള്ളവര് ഹൈബ്രിഡ് ബാറ്ററി സംഭരണ സംവിധാനത്തിലേക്ക് മാറാന് താല്പര്യം കാട്ടുന്നുണ്ട്. എങ്കിലും ട്രാന്സ്ഫോര്മറുകളുടെ ശേഷിക്കുറവ് പ്രധാന പ്രതിസന്ധിയായി തുടരുന്നു.
