കണ്ണൂര്: അഞ്ചരക്കണ്ടി ദന്തല് കോളജിലെ ബിഡിഎസ് വിദ്യാര്ത്ഥി നിതിന് രാജിന്റെ മരണത്തില് ഒന്നാം പ്രതിയായ ഡോ. എം.കെ റാം മുന്കൂര് ജാമ്യത്തിനായി ഹൈക്കോടതിയെ സമീപിക്കാന് ഒരുങ്ങുന്നു.റാമിന്റെ മുന്കൂര് ജാമ്യാപേക്ഷ കഴിഞ്ഞദിവസം തലശേരി ജില്ലാ അഡീഷണല് സെഷന്സ് കോടതി തള്ളിയിരുന്നു.
നിതിന് രാജിന്റെ മരണത്തില് കേസെടുത്തത് മുതല് ആരോപണ വിധേയരായ അധ്യാപകര് ഡോ.റാമും, ഡോ.സംഗീത നമ്പ്യാരും ഒളിവിലാണ്. കഴിഞ്ഞദിവസം ഇവരുടെ മുന്കൂര് ജാമ്യാപേക്ഷ പരിഗണിച്ച തലശേരി അഡീഷണല് ജില്ലാ സെഷന്സ് കോടതി സംഗീത നമ്പ്യാര്ക്ക് ജാമ്യം അനുവദിച്ചിരുന്നു.
നിതിന് രാജിനെതിരെ ജാതി അധിക്ഷേപമോ, ജാതിയുടെ പേരില് അപമാനമോ നടന്നതായി തെളിവില്ലെന്നായിരുന്നു മുന്കൂര് ജാമ്യാപേക്ഷകളില് തലശേരി അഡിഷണല് ജില്ലാ സെഷന്സ് കോടതി നിരീക്ഷിച്ചത്. വിദ്യാര്ഥികളോടുള്ള ഡോ. റാമിന്റെ മോശം പെരുമാറ്റം ജാതിയെ അടിസ്ഥാനമാക്കി ഉള്ളതല്ല. ലോണ് ആപ്പുകാരുടെ ഭീഷണിയും പ്രിന്സിപ്പാളിന്റെ മുറിയിലെ ചോദ്യം ചെയ്യലും തുടര്ന്നുണ്ടായ പരാതിയെക്കുറിച്ചുള്ള ഭയവുമാണ് ആത്മഹത്യയിലേക്ക് നയിച്ചതെന്നും വിധിയില് ഉണ്ട്.
എന്നാല് നിതിന് രാജിനെ കൂട്ട വിചാരണ ചെയ്യുമ്പോള് പ്രിന്സിപ്പാളിന്റെ മുറിക്ക് സമീപം ഡോ റാമിന്റെ സജീവ സാന്നിധ്യമുണ്ടായിരുന്നു എന്ന് ദൃശ്യങ്ങളില് വ്യക്തമാണ്. അതിനാല് റാമിനെ കസ്റ്റഡിയില് ചോദ്യം ചെയ്യേണ്ടത് അനിവാര്യമാണെന്ന് പറഞ്ഞാണ് തലശേരി കോടതി റാമിന് മുന്കൂര് ജാമ്യം നിഷേധിച്ചത്.
