കോട്ടയം: വയനാട്, ഇടുക്കി ഒഴികെയുള്ള എല്ലാ ജില്ലകളിലും ഇന്നും നാളെയും ഉയര്ന്ന താപനില മുന്നറിയിപ്പു(യെല്ലോ അലേര്ട്ട്) നല്കി കേന്ദ്ര കാലാവസ്ഥാ വകുപ്പ്. പാലക്കാട്ട് നാല്പ്പതും, കൊല്ലത്ത് മുപ്പത്തൊന്പതും ഡിഗ്രി സെല്ഷ്യസ് വരെ താപനില ഉയരാം. തൃശൂര്, കോട്ടയം ജില്ലകളില് 38 ഡിഗ്രി ചൂട് പ്രതീക്ഷിക്കുന്നു. പത്തനംതിട്ട, ആലപ്പുഴ, എറണാകുളം, മലപ്പുറം, കോഴിക്കോട്, കണ്ണൂര്, കാസര്കോട് ജില്ലകളില് 37 ഡിഗ്രി വരെ താപനില ഉയരാം. തിരുവനന്തപുരത്ത് 36 ഡിഗ്രിയും വരാം.
യുവി സൂചിക ഉയര്ന്നുതന്നെ
കോട്ടയം, ഇടുക്കി, ആലപ്പുഴ, പത്തനംതിട്ട ജില്ലകളില് അള്ട്രാവയലറ്റ് സൂചിക (യുവി ഇന്ഡക്സ്) ഉയര്ന്നു നില്ക്കുന്നു. ചങ്ങനാശ്ശേരി, മൂന്നാര്, ചെങ്ങന്നൂര്, കോന്നി എന്നിവിടങ്ങളില് വെള്ളിയാഴ്ച ഉച്ചയ്ക്ക് 12.30ന് എട്ടാണ് യുവി സൂചിക. എട്ടു മുതല് 10 വരെ (ഓറഞ്ച് അലര്ട്ട്) സൂചികയില് അതീവ ജാഗ്രതയും മുന്കരുതലും സ്വീകരിക്കണം.
കൊല്ലം, പാലക്കാട്, മലപ്പുറം, വയനാട് ജില്ലകളില് ഏഴും എറണാകുളം, തൃശൂര്, കോഴിക്കോട് ജില്ലകളില് ആറുമാണ് യുവി സൂചിക. ആറ് മുതല് ഏഴു വരെയും (യെല്ലോ ജാഗ്രത) മുന്കരുതലെടുക്കണം.
വേനല് മഴ അടുത്ത ആഴ്ചയോടെ
കൊടുംചൂടില് നിന്ന് ആശ്വാസമേകി അടുത്ത ആഴ്ചയോടെ വേനല് മഴ പെയ്യാന് സാധ്യതയുണ്ടെന്ന് കാലാവസ്ഥാ നിരീക്ഷകന് രാജീവന് എരിക്കുളം പറഞ്ഞു. ഉയര്ന്ന താപനില തിങ്കളാഴ്ച വരെ തുടരും. 28 മുതല് ഇടിമിന്നല്, കാറ്റ് എന്നിവയോടെയുള്ള വേനല് മഴ എല്ലാ ജില്ലകളിലും കൂടുതല് പ്രദേശങ്ങളില് ലഭിക്കാന് തുടങ്ങും. ഇതോടെ തുടര്ന്നുള്ള ദിവസങ്ങളില് താപനിലയില് കുറവു പ്രതീക്ഷിക്കുന്നു. മേയ് ആദ്യവാരവും വേനല് മഴയ്ക്ക് സാധ്യതയുണ്ട്. കൂടുതലും വൈകുന്നേരമോ രാത്രിയിലോ ആണ് വേനല് മഴ ലഭിക്കുക.
