ന്യൂദല്‍ഹി: ആശുപത്രികളിലെ ഐസിയുകള്‍ക്ക് നിര്‍ദ്ദിഷ്ട നിലവാരം ഉണ്ടായിരിക്കണമെന്ന് സുപ്രീം കോടതി സംസ്ഥാനങ്ങളോടും കേന്ദ്രഭരണ പ്രദേശങ്ങളോടും നിര്‍ദ്ദേശിച്ചു. ഇതിനു വേണ്ട പദ്ധതികള്‍ തയ്യാറാക്കാനും അത് സമയബന്ധിതമായി നടപ്പാക്കാനും ജസ്റ്റിസ് അഹ്‌സാനുദ്ദീന്‍ അമാനുള്ള, ജസ്റ്റിസ് ആര്‍. മഹാദേവന്‍ എന്നിവര്‍ ഉത്തരവിട്ടു. ഒരാഴ്ചക്കകം വിദഗ്ധരുടെ യോഗം വിളിച്ച്, കര്‍മ്മ പദ്ധതി തയ്യാറാക്കാനും ഹെല്‍ത്ത് സെക്രട്ടറിമാരോട് നിര്‍ദ്ദേശിച്ചു.
കോടതി നിര്‍ദ്ദേശങ്ങള്‍:
മുഴുവന്‍ കാര്യങ്ങളും മൂന്നാഴ്ചക്കുള്ളില്‍ പൂര്‍ത്തിയാക്കണം. ജീവനക്കാര്‍, ഉപകരണങ്ങള്‍ എന്നിവയടക്കം പ്രഥമ പരിഗണന വേണ്ട അഞ്ചു കാര്യങ്ങള്‍ കണ്ടെത്തി അവയില്‍ ശ്രദ്ധയൂന്നണം. ഐസിയു പ്രവര്‍ത്തനത്തിന് അവശ്യം വേണ്ടവയില്‍ വേണം ശ്രദ്ധിക്കേണ്ടത്. പദ്ധതി നടപ്പാക്കാനും തന്ത്രം മെനയണം. ഇത് നടപ്പാക്കുന്നത് നിരീക്ഷിക്കാനും നടപ്പാക്കിയെന്ന് ഉറപ്പാക്കാനും സംവിധാനം വേണം. പദ്ധതി ഉടന്‍ തുടങ്ങണം. വിദഗ്ധ യോഗങ്ങളില്‍ ഹെല്‍ത്ത് സെക്രട്ടറിമാര്‍ നിര്‍ബന്ധമായും പങ്കെടുക്കണം. റിപ്പോര്‍ട്ടുകള്‍ തയ്യാറാക്കി കേന്ദ്ര ആരോഗ്യ മന്ത്രാലയത്തിന് നല്‍കണം. അവര്‍ അത് സംസ്ഥാനങ്ങള്‍ക്ക് കൈമാറണം.
സ്വകാര്യ ആശുപത്രികളിലെ അനാസ്ഥ, അവഗണന, ഐസിയുകള്‍ക്കും സിസിയുകള്‍ക്കുമുള്ള പൊതുനിലവാരമില്ലായ്‌മ എന്നിവ ചൂണ്ടിക്കാട്ടിയുള്ള ഹര്‍ജി പരിഗണിക്കുകയായിരുന്നു കോടതി.
