ന്യൂദല്ഹി: ഭീകരവാദ ഫണ്ടിംഗ് കേസില് ശിക്ഷിക്കപ്പെട്ട വിഘടനവാദി നേതാവ് യാസിന് മാലികിന് പാക് ഭരണാധികാരികളുമായി അടുത്ത ബന്ധമുണ്ടെന്ന് എന്ഐഎ. യാസിന് മാലിക്കിന് വധശിക്ഷ നല്കണമെന്ന് ആവശ്യപ്പെട്ട് എന്ഐഎ സമര്പ്പിച്ച ഹര്ജി പരിഗണിക്കവെയാണ് ദല്ഹി ഹൈക്കോടതിയില് ഈ വെളിപ്പെടുത്തലുകള് നടത്തിയത്.
പാക് പ്രധാനമന്ത്രി, പ്രസിഡന്റ്, സെനറ്റര്മാര്, വിവിധ പ്രവിശ്യകളിലെ മുഖ്യമന്ത്രിമാര് എന്നിവരുമായി മാലിക് നിരന്തരം സമ്പര്ക്കം പുലര്ത്തിയിരുന്നു. ഭാരതവിരുദ്ധ പ്രചരണങ്ങള്ക്കും കശ്മീരിലെ വിഘടനവാദ പ്രവര്ത്തനങ്ങള്ക്കും ഈ സ്വാധീനം ഇയാള് ഉപയോഗിച്ചു. ജമ്മുകശ്മീരിനെ ഭാരതത്തില് നിന്ന് വേര്പെടുത്തുക എന്ന വിഘടനവാദ അജണ്ട നടപ്പിലാക്കാന് വേണ്ടിയാണ് മാലിക് ഈ ബന്ധങ്ങള് ഉപയോഗിച്ചതെന്നും എന്ഐഎ കോടതിയെ അറിയിച്ചു.
ലഷ്കര് ഇ തോയിബ സ്ഥാപകന് ഹാഫിസ് സയീദ്, ഹിസ്ബുള് മുജാഹിദീന് തലവന് സയീദ് സലാഹുദ്ദീന് തുടങ്ങിയ ഭീകരരുമായി മാലിക്കിന് നേരിട്ട് ബന്ധമുണ്ടായിരുന്നു. കശ്മീര് താഴ്വരയില് കല്ലേറുകള്ക്കും പ്രതിഷേധങ്ങള്ക്കും ആസൂത്രിതമായി നേതൃത്വം നല്കിയത് മാലിക്കിന്റെ നേതൃത്വത്തിലുള്ള ജെകെഎല്എഫ് ആണ്. ഭീകരവാദത്തിന് ധനസഹായം നല്കിയ കേസില് നിലവില് ജീവപര്യന്തം തടവ് അനുഭവിക്കുന്ന മാലിക്കിന് വധശിക്ഷ തന്നെ നല്കണമെന്നും എന്ഐഎ വാദിച്ചു.
