തോമസ് കപ്പില് ഭാരതം ഇന്ന് ആദ്യ പോരാട്ടത്തിനിറങ്ങുന്നത് കാനഡയ്ക്കെതിരെയാണ്.swathik-chi ഉച്ചയ്ക്ക് 12നാണ് മത്സരം. സിംഗിള്സില് ലക്ഷ്യസെന്നും ആയുഷ് ഷെട്ടിയും മത്സരിക്കുമ്പോള് ഡബിള്സില് പ്രതീക്ഷാ താരങ്ങളായ സാത്വിക് സായിരാജ് രങ്കി റെഡ്ഡി-ചിരാഗ് ഷെട്ടി സഖ്യമാണ് മത്സരിക്കുന്നത്. നാല് വര്ഷം മുമ്പ് ഫൈനലില് ഡെന്മാര്ക്കിനെ തോല്പ്പിച്ചാണ് ഭാരതം തോമസ് കപ്പില് ചിത്രം കുറിച്ച് കിരീടത്തില് മുത്തമിട്ടത്. അന്ന് ടീമിന് മികച്ച തുടക്കം നല്കിക്കൊണ്ട് കിഡംബി ശ്രീകാന്തും ഫിനിഷറുടെ റോളില് എച്ച്.എസ്. പ്രണോയിയും ഉണ്ടായിരുന്നു. ഇടയ്ക്ക് ഡബിള്സില് കരുത്തറിയിച്ച് സാത്വിക്-ചിരാഗ് ഷെട്ടി സഖ്യവും ഉണ്ടായിരുന്നു. ഇത്തവണ ശ്രീകാന്ത് ടീമിലില്ല. പാരിസ് ഒളിംപിക്സ് മുതല് പരിക്കും ചിക്കന് ഗുനിയ അടക്കമുള്ള പ്രശ്നങ്ങള് കാരണം കളിയെ സാരമായി ബാധിച്ച പ്രണോയിയും പോയിട്ടില്ല. പകരം അടുത്തിടെ ചില മിന്നല് നീക്കങ്ങള് കാഴ്ച്ചവച്ച ലക്ഷ്യ സെന്നും ആയുഷ് ഷെട്ടിയും കൂടെയുണ്ട്. 61 വര്ഷത്തിന് ശേഷം ഏഷ്യന് ചാമ്പ്യന്ഷിപ്പ് ഫൈനലില് പ്രവേശിച്ച ഭാരത താരം എന്ന ഖ്യാതിയുമായാണ് ആയുഷ് ഡെന്മാര്ക്കിലേക്ക് വണ്ടികയറിയിരിക്കുന്നത്. കഴിഞ്ഞ മാസം ഓള് ഇംഗ്ലണ്ട് ചാമ്പ്യന്ഷിപ്പില് റണ്ണറപ്പ് ആയതിന്റെ ആത്മവിശ്വാസം ലക്ഷ്യാ സെന്നിനും ഉണ്ട്. സാത്വിക്-ചിരാഗ് സഖ്യം കഴിഞ്ഞ സീസണില് പഴയ തിരിച്ചുവരവ് കാട്ടിയെങ്കിലും അത് പൂര്ണതോതില് വീണ്ടും പുറത്തെടുക്കുമോയെന്നാണ് ഭാരത ആരാധകര് കാത്തിരിക്കുന്നത്.
മത്സരത്തില് ഒരു മൂന്നാം സിംഗിള്സിന് സാധ്യത തെളിഞ്ഞാല് കളിപ്പിക്കാന് കിരണ് ജോര്ജ്ജിനെ കൂടെ കൂട്ടിയിട്ടുണ്ട്. ഇതേ രീതിയില് ഡബിള്സില് രണ്ടാം മത്സര സാധ്യതയ്ക്കായി ഹരിഹരന് അംസക്കരുണന്-എം.ആര്. അര്ജുന് സഖ്യത്തെയും കൂടെ കൂട്ടിയിട്ടുണ്ട്.
തോമസ് കപ്പില് ഭാരതത്തിന്റെ രണ്ടാമത്തെ മത്സരം തിങ്കളാഴ്ച്ച നിലവിലെ ഓഷ്യാനിയ ജേതാക്കളായ ഓസ്ട്രേലിയക്കെതിരെയാണ്. പ്രാഥമിക റൗണ്ടില് ഭാരതത്തിന് ഏറ്റവും കട്ടിയായ ടീം ചൈനയാണ്. ഗ്രൂപ്പ് ഘട്ടത്തിലെ അവസാന മത്സരം ബുധനാഴ്ച്ച ചൈനയുമായാണ്. 2022ല് കിരീടം ചൂടിയ ഭാരതം 2024ല് ക്വാര്ട്ടറില് വീണുപോയത് ചൈനയ്ക്ക് മുന്നിലാണ്. നിലവിലെ തോമസ് കപ്പ് ജേതാക്കളാണ് ചൈന.
