കൊല്ക്കത്ത: പി വി അന്വര് രാഷ്ട്രീയ സ്ഥിരതയില്ലാത്ത അധികാര മോഹിയാണെന്നും രാഷ്ട്രീയത്തില് നിലപാടില്ലാത്ത വ്യക്തിയാണെന്നും തൃണമൂല് കോണ്ഗ്രസ് ദേശീയ സെക്രട്ടറി വി ശിവദാസന്. ഇയാള് ഏത് പാര്ട്ടിയില് പോയാലും ആ പാര്ട്ടി അവസാനിക്കും.ഇയാള് ഒരിക്കലും ജയിക്കില്ല. ഇന്ന് പറയുന്നതല്ല നാളെ പറയുക. അധികാരമില്ലാതെ പിടിച്ച് നില്ക്കാന് കഴിയില്ല. ഇയാള് ഫ്രോഡാണെന്നും ഇയാളെ വച്ച് കേരളത്തില് തൃണമൂല് കോണ്ഗ്രസിനെ വളര്ത്താന് പറ്റില്ലെന്നും നേതൃത്വത്തിന് മനസിലായെന്നും അതിനാല് അദ്ദേഹത്തിന് കൊടുക്കുന്ന പിന്തുണ നിര്ത്തിയെന്നും ശിവദാസന് പറഞ്ഞു.
കുറച്ച് ദിവസം മുമ്പ് താന് കേരളത്തില് പോയ സമയത്ത് പി വി അന്വര് തന്റെ വീട്ടില് വന്നു. മമതാ ബാനര്ജിയെ കാണണമെന്ന് പറഞ്ഞു. ഒരു കത്ത് തന്നു. ഇതില് ഒരുപാട് എംഎല്എമാരും എംപിമാരും മറ്റ് രാഷ്ട്രീയ നേതാക്കളുമടക്കം തൃണമൂല് കോണ്ഗ്രസില് ചേരുമെന്ന് പറഞ്ഞിരുന്നു. കെ കെ രമ, തോമസ് കെ തോമസ്, പ്രതിഭ ഹരി, കെ പി മോഹനന് തുടങ്ങിയവര് അന്വറിനോപ്പം അണിചേരുമെന്നാണ് കത്തിലുള്ളത്. ഇത് അന്വേഷിക്കാന് പാര്ട്ടി നേതൃത്വം തന്നെ ചുമതലപ്പെടുത്തി. അന്വേഷിച്ചപ്പോള് അവര്ക്കാര്ക്കും അതേ കുറിച്ച് ഒന്നുമറിയില്ലെന്ന് ബോധ്യമായെന്ന് ശിവദാസന് പറഞ്ഞു.
കേരളത്തില് കോണ്ഗ്രസുമായി ചേര്ന്നു പോകുന്നത് ടിഎംസി ദേശീയ നേതൃത്വം അംഗീകരിക്കുന്നില്ലെന്നും ബംഗാളില് തിരിച്ചടിയാകുമെന്നതിനാലാണ് ഇതെന്നുമാണ് അന്വര് തിങ്കളാഴ്ച പറഞ്ഞത്.എന്നാല്, കേരളത്തില് യുഡിഎഫിനൊപ്പം നില്ക്കേണ്ടതുണ്ട്. അതിനാല് പുതിയ സംസ്ഥാന പാര്ട്ടി മേയ് 15 നുള്ളില് രൂപീകരിക്കും. യുഡിഎഫിനും രാഹുല് ഗാന്ധിക്കും ഒപ്പം നില്ക്കുമെന്നും പി വി അന്വര് പറഞ്ഞു. ബേപ്പൂരില് തനിക്ക് തൃണമൂല് കോണ്ഗ്രസിന്റെ ചിഹ്നം അനുവദിക്കാതിരുന്നതും നേതാക്കളാരും പ്രചാരണത്തിന് എത്താതിരുന്നതും കോണ്ഗ്രസ് നേതാക്കളുമായി വേദി പങ്കിടാന് കഴിയില്ല എന്നുള്ളതുകൊണ്ടാണെന്നും അന്വര് പറഞ്ഞു.
മുഖ്യമന്ത്രി പിണറായി വിജയനെതിരെ ഗുരുതര ആരോപണങ്ങള് തുടരെ ഉന്നയിച്ച് സിപിഎമ്മുമായി വഴിപിരിഞ്ഞ പിവി അന്വര്, എംഎല്എ സ്ഥാനം രാജിവച്ച് ഡിഎംകെ പാര്ട്ടി ഉണ്ടാക്കി. എന്നാല് തമിഴ്നാട് ഡിഎംകെ അംഗീകരിക്കാത്തതിനെ തുടര്ന്ന് ഒരു വര്ഷം മുന്പ് പുതിയ രാഷ്ട്രീയ നീക്കം നടത്തി തൃണമൂല് കോണ്ഗ്രസ് കേരള ഘടകത്തിന്റെ കണ്വീനര് ആയി. പിവി അന്വറിന്റെ തൃണമൂല് കോണ്ഗ്രസിനെ യുഡിഎഫ് അസോസിയേറ്റ് ഘടകകക്ഷിയാക്കുകയും ചെയ്തു.നിയമസഭാ തെരഞ്ഞെടുപ്പില് ബേപ്പൂരില് മൊഹമ്മദ് റിയാസിനെതിരെ യു ഡി എഫ് സ്ഥാനാര്ത്ഥിയാണ് പിവി അന്വര്.
