ഭോപ്പാലില് ശബരിമല അയ്യപ്പ സേവാ സമാജം മധ്യഭാരത പ്രാന്തത്തിന്റെ ആഭിമുഖ്യത്തില് സംഘടിപ്പിച്ച 'വിഷു സംഗമം' ഉദ്ഘാടന സഭ
ഭോപ്പാല്: ശബരിമല അയ്യപ്പ സേവാ സമാജം മധ്യഭാരത പ്രാന്തത്തിന്റെ ആഭിമുഖ്യത്തില് സംഘടിപ്പിച്ച മൂന്നാമത് ‘വിഷു സംഗമം’ സാംസ്കാരികവിരുന്നായി. ബിഎച്ച്ഇഎല്ലിലെ ഹേമ ഹയര് സെക്കന്ഡറി സ്കൂള് ഓഡിറ്റോറിയത്തില് നടന്ന ചടങ്ങില് നഗരത്തിലെ പ്രമുഖരും മലയാളി സമൂഹവും പങ്കെടുത്തു. കേരളത്തിന്റെ പരമ്പരാഗത കലാരൂപങ്ങളുടെ പ്രദര്ശനമായിരുന്നു പ്രധാന ആകര്ഷണം.
എല്ലാവര്ക്കും ശബരിമല അയ്യപ്പ സേവാ സമാജം ‘വിഷുക്കൈനീട്ടം’ നല്കി. തിരുവാതിര കളി, ദല്ഹിയിലെ നൃത്യാലയ പ്രൊഡക്ഷന്സ് ടീം അവതരിപ്പിച്ച നൃത്ത-സംഗീത പരിപാടികള്, കലാമണ്ഡലം അഭിഷേക് വാര്യരുടെ ശിക്ഷണത്തില് നടന്ന ‘കൃഷ്ണാര്പ്പണം’ നൃത്തശില്പം എന്നിവ ശ്രദ്ധേയമായി. കഥകളി, ഭരതനാട്യം, മോഹിനിയാട്ടം എന്നിവയിലൂടെ ശ്രീകൃഷ്ണന്റെയും രാധയുടെയും ജീവിതകഥകള് വേദിയില് പുനര്ജനിച്ചു.
ആര്എസ്എസ് മധ്യഭാരത് പ്രാന്ത കാര്യവാഹ് ഹേമന്ത് മുക്തിബോധ് മുഖ്യപ്രഭാഷണം നടത്തി. ‘ശ്രേഷ്ഠ ഭാരത ജ്ഞാന-വിജ്ഞാന’ മത്സരത്തിലെ വിജയികളെ ചടങ്ങില് ആദരിച്ചു.
മന്ത്രി വിശ്വാസ് സാരംഗ് പരിപാടിയില് പങ്കെടുത്തു. ശബരിമല അയ്യപ്പ സേവാ സമാജം രാജ്യത്തെ 13 സംസ്ഥാനങ്ങളിലായി നടത്തുന്ന മുന്നൂറിലധികം അന്നദാന കേന്ദ്രങ്ങള്, ആംബുലന്സ് സേവനങ്ങള്, മെഡിക്കല് ക്യാമ്പുകള് തുടങ്ങിയ സേവന പ്രവര്ത്തനങ്ങളെ അദ്ദേഹം പ്രശംസിച്ചു.
സമാജം അധ്യക്ഷന് ഉണ്ണികൃഷ്ണന് അധ്യക്ഷത വഹിച്ച ചടങ്ങില് ജനറല് സെക്രട്ടറി അശോകന്, വൈസ് പ്രസിഡന്റ് വിജയ് കുമാര്, സെക്രട്ടറി സുനില് കുമാര് എന്നിവര് പങ്കെടുത്തു
