തിരുവനന്തപുരം: സെക്രട്ടേറിയറ്റിനു സമീപം ശാന്തിനഗറിലുള്ള ഹൗസിങ് ബോര്ഡ് ആസ്ഥാനമന്ദിരം അപകടാവസ്ഥയില്. കാലപ്പഴക്കത്തെ തുടര്ന്ന് കെട്ടിടത്തിന്റെ പല ഭാഗങ്ങളിലെയും കോണ്ക്രീറ്റ് അടര്ന്ന് വീണ് കമ്പികള് വെളിയില് വന്ന നിലയിലാണ്.
കെട്ടിടത്തില് സ്വകാര്യസ്ഥാപനങ്ങളും നിരവധി ഓഫീസുകളും പ്രവൃത്തിക്കുന്നുണ്ട്. നാന്നൂറോളം ജീവനക്കാരാണ് ഇവിടെ ജോലിചെയ്യുന്നത്. താഴെത്തെ നിലയില് 12 കടകളാണു പ്രവൃത്തിക്കുന്നത്. ദിനം പ്രതി നൂറുകണക്കിനാളുകളാണ് വിവിധ ആവശ്യങ്ങള്ക്കായി വന്ന് പോകുന്നത്. കെട്ടിടത്തിന്റെ രണ്ടും മൂന്നും നിലകളിലെ ചുമരുകള് പലയിടത്തും പൂര്ണ്ണമായും പൊട്ടിപ്പൊളിഞ്ഞ് കിടക്കുകയാണ്. മഴ പെയ്താല് പലയിടത്തും ചോര്ന്ന് വെള്ളം ഒലിച്ചിറങ്ങുന്നത് പതിവാണെന്ന് ജീവനക്കാര് പറയുന്നു. പല പ്രാവശ്യം അധികൃതര്ക്ക് മുന്നില് പരാതി നല്കിയെങ്കിലും നടപടി സ്വീകരിച്ചില്ലെന്ന് ജീവനക്കാര് പറയുന്നു.
കെട്ടിടം നിര്മ്മിച്ച് വര്ഷങ്ങള് ഇത്രയും കഴിഞ്ഞിട്ടും പരിപാലനമോ കെട്ടിടത്തിന്റെ മേല്നോട്ടമോ സര്ക്കാര് ഇതുവരെ നടത്തിയില്ല. കെട്ടടത്തിന്റെ അപകടാവസ്ഥ സംബന്ധിച്ച് അഗ്നിരക്ഷാ സേന നിരവധി തവണ അധികൃതര്ക്ക് മുന്നറിയിപ്പ് നല്കിയെങ്കിലും കെട്ടിടം പുതുക്കി പണിയാനോ പരിഷ്കരിക്കാനോ നടപടി ഉണ്ടായില്ല.
പല ഭാഗങ്ങളിലും സിമന്റ് പൊടിഞ്ഞ് വീഴുന്നു. പല തൂണുകളും കാലപ്പഴക്കത്താല് ജീര്ണിച്ചു. കെട്ടിടത്തിന്റെ ശോചനീയാവസ്ഥയ്ക്ക് അടിയന്തരമായി പരിഹാരം കാണണമെന്നാണ് ഇവിടെയുള്ള ജീവനക്കാരുടെ ആവശ്യം. അതിനിടെ, കഴിഞ്ഞ മാസം കെട്ടിടത്തിന്റെ കോണ്ക്രീറ്റ് പാളി അടര്ന്നുവീണു. ഭാഗ്യകൊണ്ടുമാത്രമാണ് വന് അപകടം ഒഴിവായത്. ആറാംനിലയിലെ രണ്ട് മീറ്ററോളം നീളമുള്ള ഭാഗമാണ് വൈകീട്ട് അഞ്ചുമണിയോടെ അടര്ന്നുവീണത്. ഓഫീസ് വിടുന്ന സമയമാണെങ്കിലും ഈ ഭാഗത്ത് അധികം ആളുകളില്ലാതിരുന്നതിനാല് വലിയ അപകടം ഒഴിവായി. കടകളിലെ ജീവനക്കാരും സാധനങ്ങള് വാങ്ങാനെത്തിയവരും അപകടസമയത്തുണ്ടായിരുന്നു. വലിയ ശബ്ദത്തോടെയാണ് കെട്ടിടഭാഗം നിലംപതിച്ചതെന്ന് കടകളിലെ തൊഴിലാളികള് പറഞ്ഞു. അടിയന്തിരമായി കെട്ടിടം പുതുക്കി പണിയാനുള്ള നടപടി സ്വീകരിക്കണമെന്നാണ് ജീവനക്കാരുടെ ആവശ്യം.
ജന്മഭൂമി ഓണ്ലൈന്