തിരുവനന്തപുരം (പാലോട്): വികസനത്തിന് അനന്ത സാധ്യതകളുള്ള പെരിങ്ങമ്മല പഞ്ചായത്തിലെ ടൂറിസം സാധ്യതകളെ പ്രയോജനപ്പെടുത്തി പാലോട് കേന്ദ്രമായി ടൂറിസം ഹബ് എന്ന ആവശ്യം ഇനിയും യാഥാര്ഥ്യമായില്ല. യുഎന് പൈതൃക പട്ടികയില് ഇടം നേടിയ ജൈവ വൈവിധ്യത്തിന്റെ ഈറ്റില്ലവും പ്രകൃതി സൗന്ദര്യത്തിന്റെ ഇടവുമായ പെരിങ്ങമ്മലയിലെ വിനോദ സഞ്ചാര മേഖലകളും പാലോടുള്ള ബൊട്ടാണിക്കല് ഗാര്ഡന് അടക്കമുള്ള ലോകോത്തര ഗവേഷണ സ്ഥാപനങ്ങളും ബന്ധപ്പെടുത്തി കണക്റ്റഡ് ടൂറിസവും പാലോട് കേന്ദ്രമായി ടൂറിസം ഹബ്ബും യാഥാര്ഥ്യമായാല് പശ്ചിമഘട്ട മലയോര മേഖലയ്ക്ക് വലിയ വികസന സാധ്യതകള് കൊണ്ടുവരും. പരിസ്ഥിതി പ്രവര്ത്തകര്ക്കും ഗവേഷകര്ക്കും പഠനവേദി കൂടിയാണ് ഇന്ന് പെരിങ്ങമ്മലയിലെ പശ്ചിമഘട്ടം.
മലമടക്കുകളും വെള്ളച്ചാട്ടങ്ങളും വരയാടുകളും പക്ഷികളും ഇവിടെ എത്തുന്നവര്ക്ക് കൗതുകകരമായ കാഴ്ച സമ്മാനിക്കുന്നു. അരിപ്പപക്ഷി സങ്കേതവും അധികൃതരുടെ അവഗണനയിലാണ്. പാണ്ടിമൊട്ട, ചിന്നപ്പുല്മേട്, ഒടുചുട്ടപടുക്ക എന്നീ ശുദ്ധജല ചതുപ്പ് ഇതെല്ലാം കാഴ്ചയുടെ വിരുന്ന് സമ്മാനിക്കുന്നതാണ്.
ഇതോടൊപ്പം പെരിങ്ങമ്മലയുടെ അഭിമാനമായ പൊന്മുടിയേയും ബ്രൈമൂര്, മങ്കയത്തെയും ബന്ധിപ്പിച്ചു റോപ് വേയും വിനോദ സഞ്ചാരികളുടെ ആവശ്യമായിരുന്നു. നന്ദിയോട് പഞ്ചായത്തിലെ മീന്മുട്ടി ഹൈഡല് ടൂറിസം, അരിപ്പ എക്കോ ടൂറിസം, വര്ക്കല എന്നിവയെ ബന്ധപ്പെടുത്തി കണക്റ്റഡ് ടൂറിസം ആരംഭിച്ചാല് വലിയ സാധ്യതകള്ക്ക് വഴിതുറക്കും. എന്നാല് നന്ദിയോട് ഹൈഡല് ടൂറിസം അടച്ചു പൂട്ടിയിട്ട് മൂന്ന് വര്ഷമായി. മങ്കയത്തും അരിപ്പയിലും പുതിയ പദ്ധതികളോ കാര്യമായ വികസനമോ ഇല്ല. പരിസ്ഥിതി സൗഹൃദ പാലോട് ടൂറിസം ഹബ്ബ് എന്ന ആശയം വരും കാലങ്ങളിലെങ്കിലും അടിയന്തരമായി നടപ്പിലാക്കാന് നടപടി വേണമെന്നാണ് പരക്കെയുള്ള ആവശ്യം.
ജന്മഭൂമി ഓണ്ലൈന്