‘ആലപ്പുഴ: വൈറല് താരമായ പെണ്കൂട്ടിയുടേത് ശൈശവ വിവാഹമായിരുന്നു എന്ന് തെളിയിക്കുന്ന രേഖകള് പുറത്തുവിട്ട് വിഎച്ച്പി സംസ്ഥാന ജനറല് സെക്രട്ടറി അഡ്വ. അനില് വിളയില്. സിപിഎം നേതാക്കളുടെ നേതൃത്വത്തിലാണ് ഹിന്ദുമതത്തില്പ്പെട്ട പെണ്കുട്ടിയെ മുസ്ലിം മതവിശ്വാസിയായ ഫര്മാന് ഖാന് വിവാഹം ചെയ്തത്. പെണ്കുട്ടി ജനിച്ച മധ്യപ്രദേശിലെ മഹേശ്വര് സിഎച്ച്സിയിലെ രേഖകളില് കൃത്യമായി തന്നെ പ്രസവ തീയതിയും മറ്റ് വിവരങ്ങളുമെല്ലാം രേഖപ്പെടുത്തിയിട്ടുണ്ട്.
കുട്ടിയുടെ മാതാപിതാക്കളുടെ വിവരങ്ങള് കൂടാതെ, ജനന തീയതി 30-12-2009, ജനന സമയം വൈകിട്ട് 5.50ന്, ജനിച്ച കുട്ടി പെണ്ണ്, പ്രസവം ശസ്ത്രക്രിയ വഴി, അമ്മ വിവാഹം കഴിച്ചപ്പോള് പ്രായം 20, പ്രസവ സമയത്തെ പ്രായം 35, പ്രസവ സമയത്തെ കുട്ടിയുടെ തൂക്കം- 2.100 കിലോഗ്രാം, ഗര്ഭത്തിന്റെ പ്രായം 34 ആഴ്ച തുടങ്ങി ഒരു പ്രസവ സമയത്ത് മധ്യപ്രദേശിലെ നിയമപ്രകാരം തയാറാക്കേണ്ട സര്വ വിവരങ്ങളും ഈ രേഖയില് ഉണ്ട്. ഈ രേഖയുടെ അടിസ്ഥാനത്തിലാണ് ദേശീയ പട്ടിക വര്ഗ കമ്മിഷന്റെ നിര്ദേശപ്രകാരം മധ്യപ്രദേശ് സര്ക്കാര്, വ്യാജ രേഖകള് ഉപയോഗിച്ച് ഉണ്ടാക്കി കേരളത്തില് ഹാജരാക്കിയ ജനന സര്ട്ടിഫിക്കറ്റ് റദ്ദാക്കിയത്. സിപിഎം നേതാക്കളുടെ നേതൃത്വത്തില് പെണ്കുട്ടിയുടെ വിവാഹം കേരളത്തില് നടന്നത് 2026 മാര്ച്ച് 11നാണ്. അന്നത്തെ പ്രായം 16 വയസ് രണ്ട് മാസം 11 ദിവസം മാത്രമാണ്.
മധ്യപ്രദേശ് പോലീസിന്റേയും, അനില് വിളയില് ഉള്പ്പെടെയുള്ളവരുടെ നിരന്തരമായ അഭ്യര്ത്ഥനയും മാനിച്ചാണ് ദേശീയ പട്ടികവര്ഗ കമ്മിഷന് കൃത്യമായ അന്വേഷണം നടത്തി റിപ്പോര്ട്ടും തെളിവുകളും സമര്പ്പിച്ചത്. അതിന്റെ അടിസ്ഥാനത്തില് കേരള ഡിജിപിയോടും മധ്യപ്രദേശ് ഡിജിപിയോടും കമ്മിഷന് മുമ്പാകെ നേരിട്ട് ഹാജരായി റിപ്പോര്ട്ട് നല്കാന് നിര്ദേശം കൊടുത്തിട്ടുണ്ട്.
കൂടാതെ പോക്സോ, ശൈശവ വിവാഹ നിരോധന നിയമം, പട്ടികജാതി പീഡന നിയമം എന്നിവ പ്രകാരം കേസെടുക്കാനും നിര്ദേശിച്ചു. സിപിഎം സംസ്ഥാന സെക്രട്ടറി എം.വി. ഗോവിന്ദന്, മന്ത്രി വി. ശിവന്കുട്ടി, സിപിഎം ജില്ലാ സെക്രട്ടറി എ.എ. റഹീം എന്നിവരുടെ നേതൃത്വത്തിലാണ് ശൈശവ വിവാഹം നടത്തിയത്. വിവാഹം നടന്ന ക്ഷേത്രത്തിന്റെ കമ്മിറ്റിക്കാരും നിയമവിരുദ്ധ പ്രവര്ത്തനമാണ് നടത്തിയതെന്നാണ് വിമര്ശനം.
