കണ്ണൂര്: അഞ്ചരക്കണ്ടി ഡന്റല് കോളജ് വിദ്യാര്ത്ഥി നിതിന് രാജിന്റെ ദാരുണാന്ത്യത്തില് പ്രതിഷേധം ശക്തമാകുന്നതിനിടെ അദ്ധ്യാപകനെതിരേ കൂടുതല് വെളിപ്പെടുത്തലുമായി വിദ്യാര്ത്ഥികള്.
ഒന്നാം വര്ഷ ബിഡിഎസ് വിദ്യാര്ത്ഥി നിതിന്റെ മരണത്തില് ആരോപണ വിധേയനായ ഡോ. റാമിനെതിരേ ഗുരുതര വെളിപ്പെടുത്തലാണ് വിദ്യാര്ത്ഥികളുടേത്. ഡോ. എം.കെ. റാം സ്ഥിരം പ്രശ്നക്കാരനെന്നാണ് വിദ്യാര്ത്ഥികളുടെ വെളിപ്പെടുത്തല്. സ്ഥിരമായി മോശം ഭാഷ ഉപയോഗിക്കും. പതിവായി ബോഡി ഷെയ്മിങ് ചെയ്യുമായിരുന്നു. ആണ്കുട്ടികളെക്കൊണ്ട് പെണ്കുട്ടികളെ തല്ലിക്കും. നേരത്തേയും രണ്ട് തവണ റാമിനെ സസ്പെന്ഡ് ചെയ്തിരുന്നെന്നും വിദ്യാര്ത്ഥികള് പറയുന്നു.
ക്ലാസ് റൂമില് പോലും വിദ്യാര്ത്ഥികളോട് നീ പോയി ചാകൂ എന്ന് അയാള് പറഞ്ഞിരുന്നതായും വിദ്യാര്ത്ഥികള് പറഞ്ഞു. രക്ഷിതാക്കളോടുപോലും മോശമായാണ് പെരുമാറുക. രക്ഷിതാക്കളുടെ സ്റ്റാറ്റസും സാമ്പത്തിക സ്ഥിതികളുമെല്ലാം പരിഗണിച്ചാണ് പെരുമാറുക. പല തവണ പരാതിപ്പെട്ടിട്ടും പ്രിന്സിപ്പലോ മാനേജ്മെന്റോ നടപടിയെടുത്തില്ലെന്നും വിദ്യാര്ത്ഥിനികള് പറഞ്ഞു.
ഡന്റല് വിദ്യാര്ത്ഥിയുടെ ആത്മഹത്യയില് പ്രതിഷേധം ശക്തമാണ്. കുറ്റക്കാര്ക്കെതിരേ നടപടിയാവശ്യപ്പെട്ട് ബിജെപി കണ്ണൂര് സൗത്ത് ജില്ലാ കമ്മിറ്റി അഞ്ചരക്കണ്ടി മെഡിക്കല് കോളജിലേക്ക് പ്രതിഷേധ മാര്ച്ച് സംഘടിപ്പിച്ചു.
ബിജെപി സംസ്ഥാന സെക്രട്ടറി കെ. രഞ്ജിത്ത് ഉദ്ഘാടനം ചെയ്തു. കേവലം ആത്മഹത്യാപ്രേരണക്കുറ്റം ചുമത്തി സംഭവം ലഘൂകരിക്കുകയാണെന്നും ആരോപണ വിധേയര്ക്കെതിരേ കൊലക്കുറ്റത്തിനു കേസെടുക്കണമെന്നും കെ. രഞ്ജിത്ത് ആവശ്യപ്പെട്ടു. അധിക്ഷേപക്കൊലയില് സമഗ്രാന്വേഷണം നടത്തി കുറ്റക്കാര്ക്കെതിരേ നടപടി സ്വീകരിക്കണമെന്നാവശ്യപ്പെട്ട് എബിവിപി നേതൃത്വത്തില് അഞ്ചരക്കണ്ടി മെഡിക്കല് കോളജിലേക്ക് മാര്ച്ച് നടത്തി. സംസ്ഥാന സെക്രട്ടറി യദു കൃഷ്ണന് ഉദ്ഘാടനം ചെയ്തു.
