ചെന്നൈ: തമിഴ്നാട്ടില് എഐഎഡിഎംകെ നയിക്കുന്ന എന്ഡിഎ മുന്നണി അധികാരത്തിലെത്തുമെന്ന് സര്വേ ഫലം. സിഎന്എന് ന്യൂസ് വോട്ട് ട്രാക്കര് സര്വേ പ്രകാരം ഡിഎംകെയെ അപേക്ഷിച്ച് ജയസാധ്യത എഐഎഡിഎംകെയ്ക്ക് ആണെന്നാണ് സൂചന. അടുത്ത സര്ക്കാര് ആര് രൂപീകരിക്കും, ആരായിരിക്കും മുഖ്യമന്ത്രി, ആരുടെ പ്രകടന പത്രികയാണ് മികച്ചത് എന്നീ ചോദ്യങ്ങള് അടിസ്ഥാനപ്പെടുത്തിയായിരുന്നു സര്വേ.
മുഖ്യമന്ത്രി സ്ഥാനത്തേക്കുള്ള പോരാട്ടത്തില് എഐഎഡിഎംകെ നേതാവ് എടപ്പാടി കെ. പളനിസ്വാമിയും ഡിഎംകെയുടെ എം.കെ. സ്റ്റാലിനും 39 ശതമാനം പിന്തുണയോടെ ഒപ്പത്തിനൊപ്പമാണ്. ടിവികെ നേതാവും നടനുമായ വിജയ്ക്ക് 14 ശതമാനം പേരുടെ പിന്തുണയുണ്ട്.
അടുത്ത സര്ക്കാര് ആര് രൂപീകരിക്കുമെന്ന നിര്ണായക ചോദ്യത്തിന്, 42% പേര് എഐഎഡിഎംകെയ്ക്ക് ഒപ്പമാണ്. 36% പേര് ഡിഎംകെ അധികാര തുടര്ച്ച നേടുമെന്ന് അഭിപ്രായപ്പെടുന്നു. 39% പേര് എഐഎഡിഎംകെയുടെ പ്രകടന പത്രിക മികച്ചതാണെന്ന് വിലയിരുത്തുന്നു. ഡിഎംകെയുടെ പ്രകടന പത്രികയ്ക്ക് 34% പേരുടെ പിന്തുണ ലഭിച്ചു. വിജയ്യുടെ തമിഴക വെട്രി കഴകം 12% വോട്ട് നേടി.
വോട്ട് വിഹിതത്തിന്റെ കാര്യത്തിലും എഐഎഡിഎംകെ മുന്നിലാണ്. 41 ശതമാനം. ഡിഎംകെയെക്ക് 39 ശതമാനവും ടിവികെ 12 ശതമാനവും വോട്ട് നേടുമെന്നാണ് സര്വേ പ്രവചിക്കുന്നത്.
234 അംഗ നിയമസഭയില് 130-140 സീറ്റുകള് നേടി എഐഎഡിഎംകെ വ്യക്തമായ മുന്തൂക്കം നേടുമെന്നും സര്വേ പ്രവചിക്കുന്നു. ഡിഎംകെ 90-100 സീറ്റുകളും ടിവികെ 2-6 സീറ്റുകളും നേടുമെന്നാണ് കണക്കുകൂട്ടല്. മാര്ച്ച് 23നും ഏപ്രില് 6നും ഇടയില് ശേഖരിച്ച പ്രതികരണങ്ങളെ അടിസ്ഥാനമാക്കിയുള്ള സര്വേ ഫലമാണ് പുറത്തുവന്നിരിക്കുന്നത്. തെരഞ്ഞെടുപ്പ് അടുക്കുന്തോറും വോട്ടര്മാരുടെ താത്പര്യം എഐഎഡിഎംകെയിലേക്ക് ചായുന്നതായാണ് രാഷ്ട്രീയ നിരീക്ഷകരുടെ വിലയിരുത്തല്.
