തൃശൂര്: വാടാനപ്പളളിയില് ബി ജെ പി കിറ്റ് വിതരണം ചെയ്തെന്ന ഇടതു-വലതു മുന്നണികളുടെ ആരോപണത്തില് കഴമ്പില്ലെന്ന് കേന്ദ്രസഹമന്ത്രി സുരേഷ് ഗോപി. കിറ്റ് ആരോപണത്തില് സത്യമില്ല. പൊലീസ് കേസെടുക്കാത്തത് അതിനാലാണ്. കേസ് എടുപ്പിക്കാന് പറ്റുമെങ്കില് എടുപ്പിക്കൂവെന്നും സുരേഷ്ഗോപി പറഞ്ഞു.
ലോക്കല് പൊലീസിനോട് ചോദിച്ചാല് സത്യം പുറത്തുവരും. ചില ആളുകളെ ഇല്ലായ്മ ചെയ്യലാണ് നിങ്ങളുടെ ലക്ഷ്യം. തന്നെ കുറെനാള് കേസിന്റെ പേരില് നടത്തിയതല്ലേയെന്നും സുരേഷ്ഗോപി ചോദിച്ചു. വാടാനപ്പള്ളിയിലെ ഹോള്സെയില് വിതരണ സ്ഥാപനത്തില് കിറ്റുകള് ഓര്ഡര് ചെയ്യാനായി ബിജെപി നേതാവും ചലച്ചിത്ര താരവുമായ ദേവന് എത്തിയെന്ന് ആരോപിച്ചാണ് കോണ്ഗ്രസ് പ്രവര്ത്തകര് പ്രതിഷേധം ഉയര്ത്തിയത്.സി പി എം പ്രവര്ത്തകരും പ്രതിഷേധമുയര്ത്തി.
ദേവനും ബിജെപിയുടെ മുന് ബ്ലോക്ക് പഞ്ചായത്ത് അംഗം ബഗീഷ് പൂരാടനുമാണ് കിറ്റുകള് ഓര്ഡര് ചെയ്തതെന്നും ഇരുവരും സ്ഥാപനത്തിന് മുകളിലെ വീട്ടില് ഒളിച്ചിരിക്കുന്നുവെന്നും കോണ്ഗ്രസും സിപിഎമ്മും ആരോപിച്ചു. സ്ഥലത്ത് ബിജെപി പ്രവര്ത്തകര് കൂടി തടിച്ചു കൂടിയതോടെ സംഘര്ഷം മണിക്കൂറോളം നീണ്ടു. തുടര്ന്ന് പ്രതിഷേധക്കാരെ പോലീസ് അറസ്റ്റ് ചെയ്തു നീക്കി.
അതേസമയം,വോട്ടിനായി കിറ്റ് വിതരണം ചെയ്തു എന്നത് നൂറ് ശതമാനം അടിസ്ഥാനരഹിതമായ പച്ച നുണയെന്ന് ബിജെപി നേതാവും നടനുമായ ദേവന് നേരത്തേ പറഞ്ഞു. തോല്ക്കുമെന്ന് ഉറപ്പായപ്പോള് ഉണ്ടാക്കിയ നുണക്കഥയാണ് കിറ്റ് വിതരണം എന്ന് അദ്ദേഹം പ്രതികരിച്ചു.
കിറ്റ് വിതരണം ഉണ്ടായിട്ടില്ല. കിറ്റ് വിതരണം ചെയ്ത് വോട്ട് വാങ്ങുന്ന ഒരു പ്രസ്ഥാനമല്ല ബിജെപിയെന്ന് ദേവന് പറഞ്ഞു. സിസിടിവിയില് സത്യമല്ലേ വരുകയുള്ളു.താന് ഒന്നും കണ്ടിട്ടില്ല. കട ഉടമയുടെ വീട്ടില് ചായ കുടിച്ചിരിക്കുമ്പോഴാണ് ബഹളം കേട്ടത്.
വാടാനപ്പളളിയിലെ സൂപ്പര് മാര്ക്കറ്റില് വോട്ടര്മാര്ക്ക് വിതരണം ചെയ്യാന് കിറ്റ് സൂക്ഷിച്ചിരിക്കുന്നുവെന്നാണ് ആരോപണം.നടന് ദേവന് ഗോഡൗണിനോട് ചേര്ന്ന കെട്ടിടത്തില് ഉണ്ടായിരുന്നു. കട ഉടമയെ കാണാന് എത്തിയതെന്നാണ് ബിജെപി നേതാക്കള് വ്യക്തമാക്കിയത്. . ബിജെപി പ്രവര്ത്തകര് എത്തിയ വാഹനങ്ങള് പൊലിസ് പരിശോധിച്ചു.
ബിജെപി പ്രവര്ത്തകര് എത്തിയ വാഹനങ്ങള് പൊലിസ് പരിശോധിച്ചു. പ്രശ്നങ്ങള്ക്കിടയില് ഗോഡൗണിനോട് ചേര്ന്ന കെട്ടിടത്തില് നിന്നും ദേവന് പുറത്തേക്ക് വന്നു.
പൊലീസ് സി സി ടി വി പരിശോധിച്ചപ്പോള് ദേവനും ഒപ്പമുളള ബി ജെ പി പ്രവര്ത്തകരും ഗോഡൗണിലേക്ക് കയറുന്ന ദൃശ്യങ്ങള് ലഭിച്ചില്ല.ഇവര് കട ഉടമയുടെ വീട്ടിലേക്ക് കയറി പോകുന്നതാണ് ദൃശ്യങ്ങളിലുളളത്.ഗൃഹസദസിനെത്തിയതാണ് തങ്ങളെന്നും കിറ്റ് വിതരണം തെരഞ്ഞെടുപ്പില് തോല്ക്കുമെന്ന് ഉറപ്പായ എതിരാളികള് പടച്ചു വിട്ട നുണയാണെന്നും ദേവന് പറഞ്ഞു.
