സൈപ്രസ് : പശ്ചിമേഷ്യന് യുദ്ധം കത്തിക്കാളുന്നതിനാല് ജീവനില് ഭയമുള്ളതുകൊണ്ട് സൈപ്രസില് നടക്കുന്ന മത്സരത്തില് കളിക്കില്ലെന്ന് ഇന്ത്യയുടെ കൊനേരു ഹംപി തുറന്നടിച്ചിരുന്നു. ഏറെ ഫോമിലുള്ള കൊനേരു ഹംപിയ്ക്ക് നല്ല വിജയപ്രതീക്ഷയുണ്ടായിരുന്നു. ആദ്യമൊക്കെ കൊനേരു ഹംപിയ്ക്ക് വേണ്ടി മറ്റൊരു രാജ്യത്ത് മത്സരം വെയ്ക്കാമെന്ന് സംഘാടകരായ ഫിഡെ പറഞ്ഞിരുന്നെങ്കിലും പിന്നീട് അവര് ആ വാക്കില് നിന്നും പിന്മാറി.
കളിക്കാന് വരുന്നില്ലെങ്കില് പിന്മാറിക്കോളൂ എന്നായി ഫിഡെയുടെ നിലപാട്. ഇന്ത്യയുടെ വിശ്വനാഥന് ആനന്ദ് ഉള്പ്പെടെ എടുത്ത നിലപാടും ഇതായിരുന്നു. കാരണം പ്രജ്ഞാനന്ദ, ദിവ്യ ദേശ്മുഖ്, വൈശാലി എന്നിവര് കളിക്കാന് സൈപ്രസില് വരുന്നുവെങ്കില് കൊനേരു ഹംപിയ്ക്ക് മാത്രമായി എന്ത് അരക്ഷിതാവസ്ഥയാണുള്ളതെന്ന ചോദ്യം ന്യായമാണ്.
എന്നാല് ഈയിടെ ഇറാന്റെ മിസൈല് ആക്രമണത്തിന് വിധേയമായ സ്ഥലമായ സൈപ്രസില് നിന്നും ചെസിലെ വിഖ്യാതമായ കാന്ഡിഡേറ്റ്സ് ടൂര്ണ്ണമെന്റ് മറ്റൊരു രാജ്യത്തേക്ക് മാറ്റണമെന്ന കൊനേരു ഹംപിയുടെ ആവശ്യം അംഗീകരിക്കപ്പെട്ടില്ല. എന്തായാലും കൊനേരു ഹംപിയുടെ ദുഖം ഇന്ത്യയിലെ മുഴുവന് ചെസ് പ്രേമികളുടെയും വേദനയായി മാറി. അതേ സമയം വനിതാ കാന്ഡിഡേറ്റ്സില് ഇന്ത്യയുടെ വൈശാലിയും ദിവ്യ ദേശ്മുഖും മത്സരിക്കുന്നുണ്ട്. വിശ്വനാഥന് ആനന്ദും ഫിഡെ വൈസ് പ്രസിഡന്റ് എന്ന നിലയില് സൈപ്രസിലുണ്ട്. പ്രജ്ഞാനന്ദ പുരുഷവിഭാഗം കാന്ഡിഡേറ്റ്സില് മത്സരിക്കുന്നുണ്ട്.
