ന്യൂദൽഹി: ദൽഹി അതിർത്തിയിൽ നിന്ന് ലഷ്കർ-ഇ-തൊയ്ബ പ്രവർത്തകനെന്ന് സംശയിക്കുന്ന ഒരാളെ ദൽഹി പോലീസ് സ്പെഷ്യൽ സെൽ അറസ്റ്റ് ചെയ്തു. പ്രതി ഷബ്ബീർ അഹമ്മദ് ആണെന്ന് തിരിച്ചറിഞ്ഞിട്ടുണ്ട്. ഇയാൾ ഒരു സ്ലീപ്പർ സെൽ നെറ്റ്വർക്കിന്റെ ഭാഗമായി പ്രവർത്തിച്ചിരുന്നു.
ഷബ്ബീർ അഹമ്മദ് രഹസ്യമായി പ്രവർത്തിച്ചിരുന്നുവെന്നും ദേശവിരുദ്ധ പ്രചാരണം നടത്തുന്നതിൽ പങ്കാളിയാണെന്നും ഉദ്യോഗസ്ഥർ പറഞ്ഞു. രാജ്യത്ത് അശാന്തി സൃഷ്ടിക്കുന്നതിനും പൊതുജനവികാരത്തെ വൃണപ്പെടുത്തുന്നതിനുമായി ഇയാൾ നിരവധി സ്ഥലങ്ങളിൽ ആക്ഷേപകരവും ഇന്ത്യാ വിരുദ്ധവുമായ പോസ്റ്ററുകൾ ഇയാൾ ഒട്ടിച്ചതായി ആരോപിക്കപ്പെടുന്നു. പാകിസ്ഥാൻ രഹസ്യാന്വേഷണ ഏജൻസിയായ ഐഎസ്ഐയുടെ നിർദ്ദേശപ്രകാരമാണ് മൊഡ്യൂൾ വികസിപ്പിച്ചതെന്ന് അന്വേഷകർ പറയുന്നു.
2026 ഫെബ്രുവരി 8 ന് സുപ്രീം കോടതി മെട്രോ സ്റ്റേഷനിൽ സെൻട്രൽ ഇൻഡസ്ട്രിയൽ സെക്യൂരിറ്റി ഫോഴ്സ് (സിഐഎസ്എഫ്) നൽകിയ പരാതിയിൽ അന്വേഷണം ആരംഭിച്ചതിന് ആഴ്ചകൾക്ക് ശേഷമാണ് ഇയാളുടെ അറസ്റ്റ്. ജൻപഥ് ഉൾപ്പെടെ നിരവധി സ്ഥലങ്ങളിൽ പ്രകോപനപരവും ഇന്ത്യാ വിരുദ്ധവുമായ സന്ദേശങ്ങൾ ഉൾക്കൊള്ളുന്ന പോസ്റ്ററുകൾ കണ്ടെത്തിയത് ഗുരുതരമായ സുരക്ഷാ ആശങ്കകൾ ഉയർത്തിയിരുന്നു.
ബിഎൻഎസ് , ഡിപിഡിപി ആക്ട് എന്നിവയിലെ പ്രസക്തമായ വകുപ്പുകൾ പ്രകാരമാണ് കേസ് രജിസ്റ്റർ ചെയ്തത്. തുടർന്ന് സ്പെഷ്യൽ സെൽ ഗ്രൗണ്ട് ഇന്റലിജൻസും സാങ്കേതിക നിരീക്ഷണവും സംയോജിപ്പിച്ച് വിപുലമായ അന്വേഷണം ആരംഭിച്ചു. നിരവധി സംസ്ഥാനങ്ങളിലായി പ്രവർത്തിക്കുന്ന ഒരു സുസംഘടിതമായ ലഷ്കർ ഇ തൊയ്ബ മൊഡ്യൂൾ അന്വേഷണ ഉദ്യോഗസ്ഥർ കണ്ടെത്തി. സൂചനകളുടെ അടിസ്ഥാനത്തിൽ ഫെബ്രുവരിയിൽ പശ്ചിമ ബംഗാളിലും തമിഴ്നാട്ടിലും സ്പെഷ്യൽ സെൽ റെയ്ഡുകൾ നടത്തി, വ്യാജ ഐഡന്റിറ്റികൾ ഉപയോഗിച്ച് ഇന്ത്യയിൽ താമസിക്കുന്നതായി ആരോപിക്കപ്പെടുന്ന നിരവധി ബംഗ്ലാദേശി പൗരന്മാർ ഉൾപ്പെടെ നിരവധി പ്രതികളെ അറസ്റ്റ് ചെയ്തു. മൊബൈൽ ഫോണുകൾ, വ്യാജ തിരിച്ചറിയൽ രേഖകൾ, ബാങ്ക് കാർഡുകൾ, പാകിസ്ഥാൻ അനുകൂല പോസ്റ്ററുകൾ തുടങ്ങിയ കുറ്റകരമായ വസ്തുക്കൾ തിരച്ചിലിൽ കണ്ടെടുത്തു. ദൽഹിയിലെ ചെങ്കോട്ട, മതപരമായ സ്ഥലങ്ങൾ എന്നിവയുൾപ്പെടെയുള്ള സെൻസിറ്റീവ് സ്ഥലങ്ങളുടെ നിരീക്ഷണം കാണിക്കുന്ന വീഡിയോകളും ഉദ്യോഗസ്ഥർ കണ്ടെത്തി.
ഉദ്യോഗസ്ഥർ പറയുന്നതനുസരിച്ച്, ഷബീർ അഹമ്മദ് ലോൺ വിദേശത്ത് നിന്ന് പ്രവർത്തിച്ചിരുന്നു, സംഘത്തിന്റെ പ്രധാന മേലാളായിരുന്നു ഇയാൾ. തീവ്രവാദി റിക്രൂട്ട്മെന്റുകൾ, പോസ്റ്റർ കാമ്പെയ്നുകൾ ഏകോപിപ്പിക്കൽ, സാധ്യതയുള്ള ലക്ഷ്യങ്ങളുടെ നിരീക്ഷണം എന്നിവയ്ക്ക് ഇയാൾക്കെതിരെ കുറ്റം ചുമത്തിയിട്ടുണ്ട്. വ്യക്തികളെ, പ്രത്യേകിച്ച് അനധികൃത കുടിയേറ്റക്കാരെ, റിക്രൂട്ട് ചെയ്തും, പ്രചാരണം മുതൽ രഹസ്യാന്വേഷണം, സാധ്യമായ ഭീകര ആസൂത്രണം വരെയുള്ള ജോലികൾ അവർക്ക് നൽകിക്കൊണ്ടും ശൃംഖല വികസിപ്പിക്കുന്നതിൽ അയാൾ പ്രധാന പങ്ക് വഹിച്ചിട്ടുണ്ടെന്ന് അന്വേഷണ സംഘം പറഞ്ഞു.
