ന്യൂദല്ഹി: ദേശീയ തലത്തിലും വിവിധ സംസ്ഥാനങ്ങളിലും ഒരു മുന്നണിയുടെ ഭാഗമായ കോണ്ഗ്രസും സിപിഎമ്മും കേരളത്തിലെ ജനങ്ങളെ കബളിപ്പിക്കാന് കപടമത്സരം നടത്തുകയാണെന്ന് ബിജെപി ദേശീയ സെക്രട്ടറി അനില് ആന്റണി. ഇന്ഡി മുന്നണിയുടെ ഭാഗമായ ഇരുകൂട്ടരും വാസ്തവവിരുദ്ധമായ ഡീലുകളെക്കുറിച്ച് ആരോപണം ഉന്നയിക്കുകയാണെന്നും അദ്ദേഹം ബിജെപി ദേശീയ ആസ്ഥാനത്ത് നടത്തിയ വാര്ത്താസമ്മേളനത്തില് ആരോപിച്ചു.
മുഖ്യമന്ത്രിയും കോണ്ഗ്രസ് സംഘടനാ ജനറല് സെക്രട്ടറി കെ.സി. വേണുഗോപാലും വാസ്തവവിരുദ്ധമായ ഡീലുകളെക്കുറിച്ചാണ് പറയുന്നത്. ലോക്സഭാ തെരഞ്ഞെടുപ്പിലും വിവിധ സംസ്ഥാനങ്ങളില് നടന്ന നിയമസഭാ തെരഞ്ഞെടുപ്പുകളിലും നടക്കാന് പോകുന്ന തെരഞ്ഞെടുപ്പുകളിലും ഈ കൂട്ടര് ഒറ്റക്കെട്ടാണ്. കേരളത്തിലെ ജനങ്ങളെ തെറ്റിദ്ധരിപ്പിക്കാനാണ് ഇരുകൂട്ടരുടെയും ശ്രമം. എന്നാല് ഇതിനെല്ലാം അവസാനം ഉണ്ടാകാന് സമയമായി. കേരളത്തിന് നിര്ണായകമായ തെരഞ്ഞെടുപ്പാണ് നടക്കാന് പോകുന്നത്. പത്ത് വര്ഷം കേരളം ഭരിച്ച ഇടത് സര്ക്കാരിന് തുടര്ഭരണം ലഭിക്കില്ലെന്ന് നേരത്തെ നടന്ന ലോക്സഭാ തെരഞ്ഞടുപ്പും തദ്ദേശ സ്വയംഭരണ സ്ഥാപനങ്ങളിലേക്ക് നടന്ന തെരഞ്ഞെടുപ്പും തെളിയിക്കുന്നു. അഴിമതി, ദുര്ഭരണം, പിന്വാതില് നിയമനം, അക്രമരാഷ്ട്രീയം, വികസന മുരടിപ്പ് എന്നിവ ഈ സര്ക്കാര് പുറത്തുപോകുന്നതിനുള്ള കാരണങ്ങളാകും. മുന്കാലത്തെപോലെ എല്ഡിഎഫും യുഡിഎഫും മാറിമാറി ഭരിക്കുന്ന രീതിക്കും മാറ്റം വരാന് പോകുകയാണെന്നും അദ്ദേഹം പറഞ്ഞു.
ബിജെപിയെ സംബന്ധിച്ചിടത്തോളം ചരിത്രപരമായ തെരഞ്ഞെടുപ്പാണ് നടക്കാന് പോകുന്നത്. കാസര്കോട് മുതല് തിരുവനന്തപുരം വരെ മികച്ച സ്ഥാനാര്ത്ഥികളെയാണ് പാര്ട്ടി മത്സരരംഗത്ത് ഇറക്കിയിരിക്കുന്നത്. മറ്റു പാര്ട്ടികള് വിവാദത്തെക്കുറിച്ചും വിസ്മയത്തെക്കുറിച്ചും ചര്ച്ച ചെയ്യുമ്പോള് രാജീവ് ചന്ദ്രശേഖറിന്റെ നേതൃത്വത്തില് ബിജെപി മാത്രമാണ് വികസനത്തെക്കുറിച്ച് ചര്ച്ച ചെയ്യുന്നത്. കേരളത്തിന്റെ വികസനം സാധ്യമാക്കാന് ബിജെപിയുടെ നേതൃത്വത്തിലുള്ള ഇരട്ട എന്ജിന് സര്ക്കാരിന് മാത്രമേ സാധിക്കൂ. കോണ്ഗ്രസ് ഭരിക്കുന്ന കര്ണാടകയും തെലങ്കാനയും ഹിമാചല് പ്രദേശും കടുത്ത സാമ്പത്തിക പ്രതിസന്ധിയിലാണ്. ഹിമാചല് പ്രദേശില് സര്ക്കാര് ഉദ്യേഗസ്ഥര്ക്ക് ശമ്പളംപോലും കൊടുക്കാന് പറ്റാത്ത അവസ്ഥയാണെന്നും അനില് ആന്റണി ചൂണ്ടിക്കാട്ടി.
കേരളത്തില് ഇന്ന് ബിജെപിക്ക് ഒരു എംപിയുണ്ട്, മേയറുണ്ട്, ഡെപ്യൂട്ടി മേയറുണ്ട്. രണ്ട് മുനിസിപ്പാലിറ്റികളിലും നിരവധി ഗ്രാമപഞ്ചായത്തുകളിലും ഭരണമുണ്ട്. ഈ തെരഞ്ഞെടുപ്പ് കഴിയുന്നതോടെ ബിജെപി കേരളത്തിലും മറ്റ് സംസ്ഥാനങ്ങളിലെ പോലെ നിര്ണായക ശക്തിയാകും. ചുരുങ്ങിയത് 30 സീറ്റുകളില് എങ്കിലും വിജയം മുന്നില്ക്കണ്ടാണ് പ്രവര്ത്തിക്കുന്നത്. പ്രധാനമന്ത്രി നരേന്ദ്ര മോദിയുടെ നേതൃത്വത്തില് ലോകത്തിലെ മൂന്നാമത്തെ വലിയ സാമ്പത്തിക ശക്തിയായി മാറാന് ഭാരതം ഒരുങ്ങുകയാണ്. വികസിത ഭാരതത്തിനൊപ്പം കേരളവും വളരണം. അതിന് ബിജെപിക്കെ സാധിക്കൂ. ഡബിള് എന്ജിന് സര്ക്കാര് ഉണ്ടായാല് കേരളത്തിലും വികസനം വരുമെന്നും അദ്ദേഹം വ്യക്തമാക്കി. ക്രൈസ്തവര് കൂടുതലുള്ള ഗോവയിലും നോര്ത്ത് ഈസ്റ്റ് സംസ്ഥാനങ്ങളിലും എന്ഡിഎയാണ് ഭരണത്തില് ഉള്ളത്. ക്രൈസ്തവരും നരേന്ദ്ര മോദി നയിക്കുന്ന എന്ഡിഎയുടെ ഭാഗമാണെന്നും അദ്ദേഹം ചോദ്യത്തിന് മറുപടിയായി പറഞ്ഞു.
