കൊല്ലം: തെരഞ്ഞെടുപ്പിന്റെ തിരക്കിനിടയിലും രാവിലെ ആശുപത്രിയില് ഓടിയെത്തി ശസ്ത്രക്രിയ വേഷമണിഞ്ഞ് അടിയന്തിര ഹൃദയ ശസ്ത്രക്രിയ നടത്തി കൊല്ലം അസംബ്ലി മണ്ഡലം ബിജെപി സ്ഥാനാര്ഥി ഡോ. എന്. പ്രതാപ് കുമാര്.
കൊല്ലത്തെ മെഡിട്രിന ആശുപത്രിയില്, സീനിയര് ഇന്റര്വെന്ഷണല് കാര്ഡിയോളജിസ്റ്റായ ഡോ. പ്രതാപ്കുമാര് 70 വയസുള്ള രോഗിക്ക് അടിയന്തിര സങ്കീര്ണമായ ആന്ജിയോപ്ലാസ്റ്റി നടത്താനാണ് എത്തിയത്. ഡല്ഹിയിലെ ഭാരത് മണ്ഡപത്തില് നടക്കുന്ന കാര്ഡിയോളജിസ്റ്റുകളുടെ ഇന്ത്യ ലൈവ് 2026 സമ്മേളനത്തിലേക്ക് ശസ്ത്രക്രിയയുടെ തത്സമയം സംപ്രേഷണവും നടന്നു.
ഇന്ത്യയിലെയും സാര്ക്ക് രാജ്യങ്ങളിലെയും 3,500ലധികം കാര്ഡിയോളജിസ്റ്റുകള് പങ്കെടുക്കുന്ന സമ്മേളനത്തിലാണ് ലൈവ് പ്രദര്ശിപ്പിച്ചത്. പ്രമുഖ ഹൃദ്രോഗ വിദഗ്ധര് ഇത് നേരില് കണ്ടു. ഈ കേസ് സമ്മേളനത്തിലെ പ്രധാന ആകര്ഷണങ്ങളില് ഒന്നായി.
ഹൃദയത്തിലെ ധമനികളില് കട്ടിയായി കാല്സ്യം അടിഞ്ഞുകൂടിയ ബ്ലോക്കുകള് നീക്കം ചെയ്യുന്ന നടപടികള് ഏറ്റവും ബുദ്ധിമുട്ടുള്ള ഒന്നാണ്. ഈ സങ്കീര്ണ ശസ്ത്രക്രിയ വിജയകരമായി പൂര്ത്തിയാക്കി, കാല്സിഫൈഡ് ബ്ലോക്ക് നീക്കി രക്തയോട്ടം പുനഃസ്ഥാപിച്ചു. തുടര്ന്നു മൂന്നു ശസ്ത്രക്രിയ കൂടി നടത്തി ഡോ. പ്രതാപ് കുമാര് പ്രചരണത്തിലേക്ക് കടന്നു.
