മലപ്പുറം: മങ്കടയിലെ എല് ഡി എഫ് സ്ഥാനാര്ഥി എം പി അലവി സ്ഥാനാര്ഥിത്വത്തില് നിന്നും പിന്വാങ്ങുന്ന കാര്യം സ്ഥിരീകരിച്ചു .മുസ്ലീം ലീഗ് വിമതന് കുന്നത്തു മുഹമ്മദിനെ പാര്ട്ടി പിന്തുണക്കുമെന്ന് അദ്ദേഹം പറഞ്ഞു. മങ്കടയില് ജയിക്കുക എന്നതാണ് പ്രധാനം. മഞ്ഞളാം കുഴി അലി ചതിച്ചു പോയതാണെന്നും അതിനുള്ള മറുപടി നല്കണമെന്നും എം പി അലവി പറഞ്ഞു.
ലീഗ് വിമതന് കുന്നത്ത് മുഹമ്മദ് പത്രിക നല്കി. ഇനി തന്റെ സ്ഥാനാര്ഥിത്വത്തിന് പ്രസക്തി ഇല്ലെന്നും എം പി അലവി പറഞ്ഞു.
മങ്കടയിലെ മുസ്ലീം ലീഗ് എന്നാല് കുന്നത്ത് തറവാടാണെന്ന് എം പി അലവി ചൂണ്ടിക്കാട്ടി. സമസ്ത നേതാവ് ആലികുട്ടി മുസ്ലിയാരുടെ സഹോദര പുത്രനാണ് മുഹമ്മദ്. സമസ്ത വോട്ടുകളും അദ്ദേഹത്തിന് കിട്ടുമെന്ന് അലവി പറഞ്ഞു. സ്ഥാനാര്ഥി മാറുമ്പോള് എല് ഡി എഫ് പ്രവര്ത്തകര്ക്ക് വിഷമം ഉണ്ടാകും. സ്ഥാനാര്ഥിക്കല്ല എല് ഡി എഫിനാണ് വോട്ട് നല്കേണ്ടതെന്നും എം പി അലവി പറഞ്ഞു.
മഞ്ഞളാംകുഴി അലിയെ മുസ്ലീം ലീഗ് സ്ഥാനാര്ത്ഥി ആക്കുന്നതില് എതിര്പ്പ് ഉയര്ത്തിയാണ് നിയോജക മണ്ഡലം പ്രസിഡന്റ് കുന്നത്ത് മുഹമ്മദ് പത്രിക നല്കിയത്. എല്ഡിഎഫ് പിന്തുണ നല്കിയാല് സ്വീകരിക്കുമെന്ന് അദ്ദേഹം പറഞ്ഞു. ഈ സാഹചര്യത്തിലാണ് കുന്നത്ത് മുഹമ്മദിനെ പിന്തുണയ്ക്കാന് എല്ഡിഎഫ് തീരുമാനിച്ചത്.
