കണ്ണൂര്: സംസ്ഥാനത്ത് പിണറായി വിജയന്റെ തുടര്ഭരണം ഉണ്ടാകില്ലെന്ന് ഉറപ്പിച്ച് പറയാനാകില്ലെന്ന് കെ സുധാകരന്. അത്തരത്തിലൊരു ഉറപ്പ് പറയാനുള്ള കാര്യങ്ങള് തന്റെ പക്കലില്ലെന്നും അദ്ദേഹം പറഞ്ഞു.
അധികാരത്തിലെത്തുമെന്ന് കോണ്ഗ്രസും മുന്നണിയും ഉറപ്പിച്ച് പറയുന്നതിനിടെയാണ് പിണറായി സര്ക്കാരിനെ പൂര്ണമായും തള്ളാതെ സുധാകരന്റെ അഭിപ്രായപ്രകടനം. എഐസിസി അദ്ധ്യക്ഷന് മല്ലികാര്ജുന ഖാര്ഗെ തനിക്ക് മറ്റൊരു പദവി ഉറപ്പ് നല്കിയതിന്റെ അടിസ്ഥാനത്തിലാണ് സ്ഥാനാര്ത്ഥിത്വത്തില് നിന്ന് പിന്മാറിയതെന്നും സുധാകരന് പറഞ്ഞു.
നിയമസഭയിലേക്ക് മത്സരിക്കാന് കഴിയാത്തതില് വിഷമമുണ്ട്. അര്ഹതയുണ്ടായിട്ടും സീറ്റ് കിട്ടാത്തതിലാണ് വിഷമം. തന്റെ അനുയായികള്ക്കായി സീറ്റുകള് ആവശ്യപ്പെട്ടെങ്കലും അത് സംസ്ഥാന നേതൃത്വം വെട്ടുകയായിരുന്നുവെന്നും കെ സുധാകരന് പറഞ്ഞു.എംപിമാരായ കൊടിക്കുന്നില് സുരേഷ്, എംകെ രാഘവന്, അടൂര് പ്രകാശ്, ബെന്നി ബെഹനാന് എന്നിവരും മത്സരിക്കാന് ആഗ്രഹിച്ചിരുന്നു.എന്നാല് എംപിമാര് മത്സരിക്കേണ്ട എന്നത് ഹൈക്കമാന്ഡ് തീരുമാനമാണ്.
മുതിര്ന്ന നേതാവ് എ.കെ ആന്റണി തന്നെ ഫോണില് വിളിച്ച് കടുത്ത തീരുമാനത്തിലേക്ക് പോകരുതെന്ന് അഭ്യര്ത്ഥിച്ചിരുന്നുവെന്ന് സുധാകരന് പറഞ്ഞു. തിരഞ്ഞെടുപ്പില് മുഖ്യമന്ത്രി പിണറായി വിജയന് എതിരെ ധര്മ്മടത്ത് മത്സരിക്കാന് തയാറായിരുന്നു. അങ്ങനെയൊരു ആഗ്രഹം പല സുഹൃത്തുക്കളോടും പങ്കുവച്ചപ്പോള് അത് വേണ്ട എന്നായിരുന്നു അവര് പറഞ്ഞത്. ദല്ഹിയിലേക്ക് പോയത് സീറ്റിന് വേണ്ടിയല്ല. സാധാരണ യാത്ര മാത്രമായിരുന്നു അതെന്നും സുധാകരന് പറഞ്ഞു.
പാര്ട്ടിയെ മുള്മുനയില് നിര്ത്തിയെന്ന പ്രചാരണം ശരിയല്ല. സ്വതന്ത്രനായി മത്സരിക്കാന് ഒരു ഘട്ടത്തിലും ആലോചിച്ചിരുന്നില്ലെന്നും സുധാകരന് പറഞ്ഞു.
